Oliy malaka toifasiga ega bo‘lgan, yaʼni bosh o‘qituvchi lavozimida faoliyat yuritayotgan pedagoglar uchun ipoteka krediti bo‘yicha davlat subsidiyalariga arizalar qabul qilish 20 apreldan boshlanadi. Bu haqda Iqtisodiyot va moliya vazirligi maʼlum qildi.
Rasmiy maʼlumotga ko‘ra, arizalar qabul qilish jarayoni joriy yil 20 aprel kuni soat 14:00 dan start oladi. Dastur doirasida o‘qituvchilarga ipoteka krediti bo‘yicha dastlabki badalning 25 foizi davlat tomonidan qoplab beriladi.
Subsidiya olish uchun arizachi bir qator belgilangan ijtimoiy talablarga javob berishi kerak. Jumladan, uning kredit tarixi kamida bir tijorat bankining ichki talablariga mos bo‘lishi shart.
Shuningdek, arizachi yoki uning turmush o‘rtog‘i nomida respublika bo‘yicha ikki va undan ortiq ko‘chmas mulk mavjud bo‘lmasligi lozim. Dastur doirasida kamida 15 yillik pedagogik tajribaga ega bo‘lish hamda oliy malaka toifasi yoki bosh o‘qituvchi lavozimida ishlash asosiy talablardan hisoblanadi.
Arizalarni topshirish uchun fuqarolar Davlat xizmatlari markazlariga murojaat qilishlari, shuningdek my.gov.uz portali yoki MyGov mobil ilovasidan foydalanishlari mumkin.
Ushbu subsidiya orqali fuqarolar 15 ta bankdan ipoteka kreditini rasmiylashtirish imkoniga ega bo‘ladi. Tegishli banklar ro‘yxati rasman eʼlon qilingan.
Eslatib o‘tamiz, mazkur tartib VMQ–69-son qaror asosida, oliy toifali pedagoglarni ijtimoiy qo‘llab-quvvatlash maqsadida joriy etilgan.
“Zamin”ni Telegramʻda oʻqing!
