Chegarada go‘dak tagligidan tilla quymalari topildi

Toshkent viloyatida joylashgan «Navoiy» chegara bojxona postida bolalardan foydalangan holda tilla quymalari va yirik miqdordagi naqd valyutani mamlakatdan noqonuniy olib chiqishga bo‘lgan ikki urinish fosh etildi. Bu haqda Bojxona qo‘mitasi raisi matbuot kotibi Husan Tangriyev ma’lum qildi.

Qayd etilishicha, O‘zbekistondan chiqib ketayotgan ayol o‘zining go‘dak farzandi tagligi orasiga qariyb 200 gramm og‘irlikdagi ikki dona tilla quymasini yashirgan holda davlat chegarasidan olib o‘tishga uringan. Bojxona xodimlari tomonidan o‘tkazilgan tekshiruv davomida ushbu qonunbuzarlik aniqlangan.

Bundan tashqari, ayolning shaxsiy buyumlari ko‘zdan kechirilganda bojxona nazoratiga taqdim etilmagan, umumiy og‘irligi 70 gramm bo‘lgan zargarlik buyumlari ham topilgan. Ma’lum qilinishicha, mamlakatdan olib chiqishga urinilgan tilla quymalari va taqinchoqlarning umumiy qiymati qariyb 450 million so‘mni tashkil etgan.

Yana bir holatda esa qo‘shni davlat fuqarosi 14 yoshli qizining kiyimlari ostiga 40 ming AQSH dollari miqdoridagi naqd pulni yashirib, uni chegara orqali olib chiqishga uringan. Biroq mazkur qonunbuzarlik ham bojxona xodimlari tomonidan o‘z vaqtida aniqlanib, uning oldi olingan.

Eslatib o‘tish joizki, amaldagi tartibga ko‘ra, jismoniy shaxslar O‘zbekistondan 100 million so‘mga teng yoki undan oshmaydigan miqdordagi naqd valyutani bojxona qoidalariga rioya qilgan holda cheklovsiz olib chiqishi mumkin. Mazkur tartib mamlakat rezidentlari va norezident jismoniy shaxslari uchun bir xil amal qiladi.

Shuningdek, qonunchilikka muvofiq, voyaga yetmagan shaxsni huquqbuzarlik yoki jinoyat sodir etishga jalb qilish javobgarlikni og‘irlashtiruvchi holat hisoblanadi. Bunday huquqbuzarlik uchun bazaviy hisoblash miqdorining 10 baravaridan 30 baravarigacha jarima qo‘llanilishi mumkin. Agar voyaga yetmagan shaxs jinoyat sodir etishga jalb qilingan bo‘lsa, aybdor shaxs 5 yildan 10 yilgacha ozodlikdan mahrum qilinishi mumkin.

Hozirda mazkur ikki holat yuzasidan bojxona organlari tomonidan surishtiruv ishlari davom ettirilmoqda. Huquqni muhofaza qiluvchi idoralar barcha holatlarga huquqiy baho berish jarayonini olib bormoqda.