Ozoda Nursaidova Sabrina voqeasi bo‘yicha yana gapirdi: “Notayin odamlar bilan ishlaganim uchun afsusdaman”

“Xalqlar do‘stligi” san’at saroyida konsert dasturini namoyish etayotgan O‘zbekistonda xizmat ko‘rsatgan artist Ozoda Nursaidova o‘z klipi suratga olish vaqtida sodir bo‘lgan halokatli hodisaga yana bir bor munosabat bildirdi. U noprofessional va mas’uliyatsiz odamlar bilan ishlash orqali hech qanday ijodiy yutuq bo‘lmasligini ta’kidladi.

“Hamma narsani boshlagan, o‘sha qizni 'Gelik'ka o‘tqizgan odam hozir men yo‘q edim, bilmabman deb o‘ziga javobgarlikdan qochyapti. To‘qmoq avvaliga mening boshimda sindi, u esa o‘sha yerda o‘zini go‘yoki hech narsadan bexabar qilib turibdi. Men shunday xulosaga keldim: bundan keyin noprofessional, tayini yo‘q odamlarni hech qachon yaqinimga yaqinlashtirmayman,” — dedi Ozoda.

“Harom-harish odamlar bilan san’at qila olmaymiz”

Nursaidova o‘z atrofida ishlaydigan jamoaga nisbatan talabchanlik kuchaytirilishini aytdi. Uning so‘zlariga ko‘ra, san’atga tasodifan kirib qolgan, tayyorgarligi va mas’uliyati yo‘q insonlar bilan ishlash nafaqat xavfli, balki tahlikali oqibatlarga ham olib kelishi mumkin.

“Hech qachon bunaqa odamlarni o‘ziga yaqinlashtirmaslik kerak. San’at bu – javobgarlik, bu – kasb, bu – halol ish. Biz notayin odamlarning kasriga qolib ketdik,” — deya qo‘shimcha qildi u.

Eslatma: mudhish hodisaning tafsilotlari

15 may kuni Jinoyat ishlari bo‘yicha Mirzo Ulug‘bek tumani sudida aktrisa Sabrina Jabborova bilan bog‘liq halokat yuzasidan sud jarayoni boshlandi. Ozoda Nursaidovaning “Dilbarim” qo‘shig‘iga klip suratga olish vaqtida 16 yoshli aktrisa “Gelik” rusumli avtomobilni boshqarib, Sabrina Jabborovani bosib ketgan edi.

Sabrina jarohat olgandan so‘ng, Toshkentda muvaffaqiyatsiz jarrohlik amaliyotidan keyin bir oyog‘i qisqalasha boshlagan. Ijtimoiy tarmoqlardagi chiqishidan so‘ng ko‘ngillilar tomonidan unga 367 million so‘m mablag‘ yig‘ib berildi va u Turkiyadagi klinikada ikkinchi marta operatsiya qilindi. Hozirda u to‘g‘ri yurishni boshlagan.

Zamin.uz tahririyati ushbu hodisa bo‘yicha barcha jarayonlarni yoritishda davom etadi. Siz bu holatga qanday baho bergan bo‘lar edingiz? “Zamin”ni Telegramʻda oʻqing!