Nihol mukofoti sovrindori, yosh va iste’dodli xonanda Guljahon Xolxo‘jayeva mualliflik huquqini buzgani uchun ma’muriy javobgarlikka tortildi. Bu haqida Adliya vazirligi rasmiy ma’lumot berdi.
Vazirlikka Mualliflik va turdosh huquqlarni himoya qilish jamoat birlashmasi tomonidan murojaat kelib tushgan. Unda xalq orasida “Salomiy” taxallusi bilan tanilgan shoir Abdusaid Abdusalomovga tegishli “Senmiding” nomli she’r muallifning ruxsatisiz ijro etilgani haqida so‘z borgan.
O‘rganish jarayonida ma’lum bo‘lishicha, O‘zbekiston va Qoraqalpog‘iston xalq artisti Yulduz Usmonova ijrosida ommalashgan “Senmiding” qo‘shig‘ining she’riy matnini Guljahon Xolxo‘jayeva muallifning roziligisiz ijro etgan. Bu holat yuzasidan unga nisbatan ma’muriy huquqbuzarlik to‘g‘risida bayonnoma rasmiylashtirilib, sudga yuborilgan.
Jinoyat ishlari bo‘yicha Mirzo Ulug‘bek tuman sudi qaroriga ko‘ra, xonanda Ma’muriy javobgarlik to‘g‘risidagi kodeksning 177^1-moddasi (mualliflik va turdosh huquqlarni buzish)ning 1-qismiga muvofiq jarima jazosiga tortildi.
Ma’lumot uchun, amaldagi qonunchilikka ko‘ra, muallif huquqbuzardan faqat zararni qoplashni emas, balki bazaviy hisoblash miqdorining 20 baravaridan 1000 baravarigacha miqdorda tovon to‘lashni ham talab qilish huquqiga ega.
Mutaxassislar ta’kidlashicha, mualliflik huquqini hurmat qilish va ijodkor mehnatiga adolatli munosabatda bo‘lish san’at olamining barqaror va sog‘lom rivojlanishi uchun juda muhim.
“Zamin”ni Telegramʻda oʻqing!
