Prezident administratsiyasi rahbari Saida Mirziyoyeva 22-noyabr kuni Qatar poytaxti Dohada o‘tgan nufuzli kino festivalida ishtirok etdi. Uning tashrifi nafaqat ijod va madaniyat ahli e’tiborini tortdi, balki O‘zbekistonning zamonaviy san’at maydonidagi faol ishtiroki yana bir bor namoyon bo‘ldi.
Festival dunyo kino sohasida mustaqil va mualliflik yo‘nalishida ishlayotgan rejissyorlar uchun muhim platforma hisoblanadi. Mirziyoyevaning ta’kidlashicha, bu maydon yangi g‘oyalar, jasoratli badiiy yondashuvlar va o‘z nuqtayi nazarini erkin ifoda eta oladigan ijodkorlar uchun qimmatli imkoniyat yaratadi. Festival dasturida turli mamlakatlardan taqdim etilgan filmlar jamlangan bo‘lib, yosh ijodkorlar va mahalliy kinochilarga alohida e’tibor qaratiladi.
Saida Mirziyoyeva o‘z telegram-kanalida yozishicha, zamonaviy kino faqat san’at emas — u jamiyatdagi kayfiyat, muammo va umidlarni ko‘rsatib beradigan kuchli ifoda vositasi. Ushbu festivalga tashrif buyurish jarayonida u Qatarning madaniy markazlarida o‘tkazilayotgan tadbirlar bilan ham tanishdi.
Tashrif doirasida Prezident administratsiyasi rahbari Fashion Trust Arabia (FTA) jamg‘armasi faoliyati bilan ham tanishdi. Mazkur tashabbus Yaqin Sharq va Shimoliy Afrika mintaqasidan yetishib chiqayotgan iste’dodli dizaynerlarni qo‘llab-quvvatlashga qaratilgani bilan ahamiyatli. Sayohat davomida u M7 madaniyat markazidagi Threads of Impact ko‘rgazmasiga ham tashrif buyurdi.
Uning aytishicha, ko‘rgazmada O‘zbekiston dizaynerlarining qo‘l mehnati va milliy an’analarini aks ettiruvchi “Woven Legacies: Uzbekistan’s Living Heritage” ekspozitsiyasi juda ko‘pchilikda qiziqish uyg‘otgan. Mirziyoyeva bu kabi loyihalar orqali milliy merosni jahon sahnasida namoyish etish muhim ekanini ta’kidladi.
Shuningdek, u mashhur me’mor Rem Koolhaas va Samir Bantal rahbarligidagi “Countryside: A Place to Live, Not to Leave” nomli ko‘rgazmani ham tomosha qildi. Ko‘rgazma qishloq hayotining zamonaviy qiyofasi, uni saqlab qolish va rivojlantirish masalalariga bag‘ishlangan bo‘lib, Mirziyoyeva undagi g‘oyalarni katta qiziqish bilan kuzatgani ma’lum qilindi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
