Burak O‘zchivit faqat o‘zi suratga tushgan seriallari unga yoqishini aytib internetni portlatdi
Turk kinolari va seriallari muxlislari yaxshi taniydigan Burak O‘zchivit yana Rossiyaga tashrif buyurdi va bu safar ham uning kelishi katta qiziqish bilan kuzatildi. 2 mart kuni mashhur aktyor “Istanbulning eng go‘zal qizi” nomli monospetaklini tomoshabinlarga taqdim etdi. Oradan bir kun o‘tib esa u ommaviy axborot vositalari vakillari bilan uchrashib, turli savollarga javob qaytardi.
Matbuot anjumanida berilgan savollar orasida eng ko‘p muhokamaga sabab bo‘lgani — Burakning shaxsan o‘zi qaysi turk seriallarini sevib tomosha qilishi haqidagi savol bo‘ldi.
Burakning fikricha, turk seriallari bugun dunyoning ko‘plab davlatlarida mashhur. Ammo aynan Rossiyada ularga nisbatan o‘ziga xos iliq munosabat bor. Aktyor buni tomoshabinlarning hikoyalar, obrazlar va ssenariydagi tuyg‘ularni yaqin qabul qilishi bilan izohladi. Uning aytishicha, turk ekran asarlaridagi voqealar rossiyalik muxlislar qalbiga ham tez yetib boradi, shu bois bunday loyihalar bu yerda katta qiziqish uyg‘otadi.
Shundan keyin Burak O‘zchivit o‘ziga eng yoqqan to‘rtta loyihani sanab o‘tdi. U “Muhtasham yuz yil”, “Choliqushi”, “Sevgi iztirobi” va “Hukmdor Usmon”ni o‘zining eng sevimli seriallari sifatida tilga oldi. Tabiiyki, bu ro‘yxat ko‘pchilik e’tiborini o‘ziga tortdi. Chunki sanab o‘tilgan barcha loyihalar aktyorning shaxsan o‘zi ishtirok etgan ishlari edi.
Tanqidchilar orasida “nega ro‘yxatga o‘zi qatnashmagan birorta serial kirmadi?”, “tanlov biroz xudbinona chiqqan”, “kamida bitta begona loyihani ham aytib o‘tsa bo‘lardi” qabilidagi fikrlar yangradi.
Albatta, Burakning muxlislari bu tanqidlarga o‘z munosabatini bildirmay qolmadi. Ularning qarashicha, aktyor o‘ziga eng yaqin bo‘lgan, mehnat qilgan va qalbidan joy olgan loyihalarni aytgan, xolos. Axir har bir ijodkor uchun o‘z qo‘li, o‘z mehnati singgan asar alohida qadrli bo‘lishi tabiiy hol. Shu ma’noda, uning javobini kibr emas, balki samimiy tanlov sifatida qabul qilish mumkin.
“Zamin”ni Telegramʻda oʻqing!
