Aktrisa va instabloger Xonzoda Qambarova YouTube’dagi “Qiyofa” podkastida shaxsiy hayotiga doir ko‘pchilikni qiziqtirgan savollarga javob berdi. U oilasi nega buzilgani, nima uchun alimentdan voz kechgani va farzand tarbiyasidagi qarashlari haqida ochiq gapirdi.
Xonzodaning aytishicha, turmushi davomida u bir necha bor xiyonatga duch kelgan. Hatto uch marta shunday holatni o‘z ko‘zi bilan ko‘rganini ta’kidladi. Shunga qaramay, u bu dardni ommaga oshkor qilishni istamagan. Uning fikricha, shaxsiy muammolarni ko‘z-ko‘z qilish hech qanday natija bermaydi.
Bloger avvalgi intervyusidagi “kolbasaga pulimiz yo‘q edi” degan gaplariga ham izoh berdi. U bolaligida oddiy hayot kechirganini, maktabda boshqalardan kamroq imkoniyatga ega bo‘lgani uchun o‘ziga nisbatan noqulaylik his qilganini aytdi. Ammo bu holat keyinchalik uning eng katta motivatsiyasiga aylangan.
Ayol baxti haqidagi qarashlari ham e’tiborli. Uning ta’kidlashicha, ba’zi hollarda ortiqcha yugur-yugurdan ko‘ra sokin hayot kechirish insonni baxtga yaqinlashtiradi. Biroq u o‘zini “dangasa” bo‘la olmaydigan insonlar qatoriga qo‘shdi.
Farzand tarbiyasida esa Xonzoda muvozanatni saqlashga harakat qiladi. Qizlariga barcha sharoitni yaratib berish bilan birga, ortiqcha erkalashning oldini olishga intilgan. Shu maqsadda katta qizini bir muddat davlat bog‘chasiga o‘tkazganini ham aytib o‘tdi.
Eng ko‘p muhokama qilingan masalalardan biri — aliment. Xonzoda bolalari uchun majburiy pul olishni istamasligini bildirdi. Uningcha, insondan zo‘rlab mablag‘ undirishdan ko‘ra, ixtiyoriy yordam qimmatroq.
Shu bilan birga, u farzandlarining otasi bilan munosabatiga qarshi emas. Aksincha, bolalar otasi mehrini his qilishi kerak, deb hisoblaydi. Ammo hozircha faqat katta qizi otasi bilan ko‘proq vaqt o‘tkazmoqda.
Xonzoda o‘z hayotidagi qiyin sinovlarga qaramay, bugun yolg‘iz onalar uchun o‘rnak bo‘lishga harakat qilayotganini ta’kidladi.
“Zamin”ni Telegramʻda oʻqing!
