«Oskar» mukofoti g‘oliblari e’lon qilindi

Hollivuddagi Dolby Theatre saroyida kino olamining eng nufuzli — «Oskar» mukofotini topshirish marosimi bo‘lib o‘tdi.

Tashkilotchilar bu yil ilk bor sakkiz nominatsiya (pardoz, original musiqa, sahnalashtirish, ovoz, montaj, qisqa metrajli animatsion film, qisqa metrajli hujjatli va badiiy film) g‘oliblarini tantanali marosim oldidan e’lon qilishga qaror qildi.

Bu yil «Oskar» mukofotiga jami 38 ta asar da’vogarlik qildi. Quyida asosiy nominatsiyalar bo‘yicha g‘oliblarni tanishtiramiz.

Operatorlik ishi va maxsus effektlar
«Dyuna» filmi ushbu nominatsiyada mukofotni qo‘lga kiritdi.

^{«Dyuna» filmidan kadr.}
Deni Vilnyovning ushbu filmi «Oskar» mukofotiga o‘nta nominatsiya bo‘yicha nomzod bo‘ldi, jumladan, yilning eng yaxshi filmi nomiga ham da’vogarlik qildi. Operatorlik ishi bo‘yicha «Oskar» mukofoti Greyg Freyzerga, vizual effektlar mukofot esa to‘rt kishilik jamoaga nasib etdi.

Multfilm
Disneyning «Enkanto» filmi to‘liq metrajli animatsion film nominatsiyasida «Oskar»ni qo‘lga kiritdi.

^{«Enkanto» multfilmidan kadr.}
Ikkinchi plandagi rol
Troy Kotsur «CODA: kar ota-onaning farzandi» filmida «Ikkinchi plandagi eng yaxshi aktyor» nominatsiyasida Akademiya mukofotiga loyiq topilgan bo‘lsa, «Vestsayd tarixi» musiqiy filmi aktrisasi Ariana DeBos «Ikkinchi plandagi eng yaxshi aktrisa» mukofotiga sazovor bo‘ldi.

^{Aktrisa Ariana DeBos.}
Eng yaxshi ssenariy
Kennet Brana «Belfast» filmi uchun original ssenariy uchun Akademiya mukofotini qo‘lga kiritgan bo‘lsa, «CODA» filmi ssenariysi muallifi va rejissyori Shan Xeyder «Eng yaxshi moslashtirilgan ssenariy» uchun taqdirlandi.

^{«Belfast» filmidan kadr.}
Rejissyorlik ishi
Jeyn Kempion «The Power of the Dog» filmi uchun «Eng yaxshi rejissyor» nominatsiyasida g‘olib bo‘ldi.

^{«The Power of the Dog» filmidan kadr.}
Qo‘shiq
Xonanda Billi Aylish Jeyms Bond haqidagi so‘nggi — «O‘lishning vaqti emas» filmi uchun yozilgan qo‘shig‘iga «Oskar» mukofotini qo‘lga kiritdi.

^{Billi Aylish.}
Eng yaxshi aktyor
Uill Smit «Qirol Richard» kartinasidagi roli uchun «Eng yaxshi aktyor» nominatsiyasida Akademiya mukofoti bilan taqdirlandi.

^{«Qirol Richard» filmidan kadr.}
Eng yaxshi aktrisa
Jessika Chesteyn «Temmi Feyning ko‘zlari» filmidagi ijrosi uchun «Eng yaxshi aktrisa» nominatsiyasida «Oskar» mukofotini qo‘lga kiritdi.

^{Amerikalik aktrisa Jessika Chesteyn.}
Eng yaxshi film
Shan Xeyderning «CODA» filmi yilning eng yaxshi filmi nominatsiyasida «Oskar» mukofotiga loyiq topildi.

^{«CODA: kar ota-onaning farzandi» filmidan kadr.}

Oskar mukofoti1, Nominatsiya1, Eng yaxshi aktyor1, Eng yaxshi aktrisa1, Eng yaxshi film1, CODA1, Billi Aylish1 “Zamin” yangiliklarini “Youtube”da kuzatib boring