O‘zbekiston kompaniyalari $5 mlnlik eksport shartnomalarini tuzdi

Kursiv xabariga ko‘ra, Jahon bankining E-Gate dasturi orqali O‘zbekiston, Tojikiston va Qirg‘izistondan 83 ta kompaniya Alibaba platformasiga a’zo bo‘lib, umumiy $23 millionlik eksport shartnomalari tuzdi.

Ushbu dastur 2024-yil may oyida ishga tushirilib, ishtirokchilarning 40% dan ortig‘i O‘zbekistondagi kichik va o‘rta biznes vakillari bo‘ldi.

O‘zbekistonlik tadbirkorlar mato, yong‘oq, quritilgan meva va boshqa mahsulotlar eksporti bo‘yicha $5 millionlik shartnomalar tuzishdi. Asosiy xaridorlar Buyuk Britaniya va Yangi Zelandiyadan bo‘ldi.

Jahon bankiga ko‘ra, ushbu dastur Markaziy Osiyo davlatlari o‘rtasida elektron savdoning faollashuviga olib keldi. Mintaqaviy eksport hajmi $16 millionga yetgan.

2025-yil may oyida Toshkentda o‘tkazilgan e-commerce bo‘yicha mintaqaviy konferensiyada O‘zbekiston, Qirg‘iziston va Tojikiston e-commerce uyushmalari o‘zaro hamkorlik to‘g‘risida memorandum imzolashdi. Hujjat transchegaraviy elektron savdoni qo‘llab-quvvatlashni nazarda tutadi.

Mutaxassislar fikricha, O‘zbekiston, Qozog‘iston, Qirg‘iziston va Tojikistondagi e-commerce bozori hajmi $3 milliard bo‘lsa-da, raqamli infratuzilmaning sustligi, logistik xarajatlar yuqoriligi va raqamli savodxonlik pastligi uni sekinlashtirmoqda.

Shuningdek, murakkab soliq tartibi va yetkazib berishdagi muammolar sababli noformal e-savdo ulushi yuqori bo‘lib qolmoqda. Amaldagi qonunchilik esa ko‘plab sotuvchi va xaridor ehtiyojlariga mos kelmaydi.

Markaziy Osiyoda yagona elektron savdo bozori mavjud emasligi sababli tarmoq rivojlanishi cheklangan, deya bildirildi konferensiyada.