O‘zbekistonda Xabarovsk ikrasi uchun ombor quriladi

O‘zbekiston hududida Xabarovsk (Rossiya)dan olib kelinadigan qizil ikra va baliq mahsulotlarini saqlash uchun ombor qurish rejalashtirilmoqda, deb Kursiv Media xabar berdi. Bu haqda Xabarovsk o‘lkasi rahbari Dmitriy Demeshin ma’lum qilgan.

Loyiha O‘zbekistonning Rossiyadagi favqulodda va muxtor elchisi Botirjon Asadov bilan gubernator o‘rtasidagi uchrashuvda muhokama qilindi. Ushbu ombor O‘zbekistonning baliq mahsulotlari importini oshirishga xizmat qiladi. Shuningdek, ombor Markaziy Osiyodagi boshqa davlatlarga ham yetkazib berishda ishlatiladi.

Shuningdek, tomonlar Xabarovskka o‘zbek mevalarini eksport qilish, hamda gumanitar hamkorlik masalalarini muhokama qilishdi. Demeshin Xabarovsk va Samarqand o‘rtasida to‘g‘ridan-to‘g‘ri aviaqatnovlar yo‘lga qo‘yilishini e’lon qildi. Hozirda bu yo‘nalishda samolyotlar Toshkentga uchmoqda.