Oliy ta’lim muassasalari bakalavriat yo‘nalishlariga kirish test sinovlari natijalaridan norozi bo‘lgan abituriyentlar uchun apellyatsiya berish jarayoni va muddatlari ma’lum qilindi. Bilim va malakalarni baholash agentligi xabariga ko‘ra, shikoyat arizalari 15 avgustdan 24 avgustgacha, ya’ni 10 kun davomida qabul qilinadi.
Apellyatsiya qanday beriladi?
Arizalar faqat onlayn tarzda, my.uzbmb.uz sayti orqali shaxsiy kabinetdan topshiriladi. Shikoyat berish huquqiga ega bo‘lish uchun abituriyent test sinovida ishtirok etgan va undan chetlatilmagan bo‘lishi shart.
Jarayon va talablar
Ariza yuborilgandan so‘ng, har bir abituriyentga uni ko‘rib chiqish kuni va soati ko‘rsatilgan xabarnoma taqdim etiladi. Belgilangan sanada va vaqtda abituriyent shaxsini tasdiqlovchi hujjat hamda xabarnoma bilan Bilimni baholash agentligi yoki xabarnomada ko‘rsatilgan manzilga kelishga majbur.
Ko‘rib chiqish sanasi
Apellyatsiya shikoyatlarini ko‘rib chiqish jarayoni joriy yil 21 avgustdan boshlanadi. Mutasaddilar ta’kidlashicha, belgilangan qoidalarga qat’iy amal qilish har bir ishtirokchining huquqini to‘liq ta’minlashga xizmat qiladi.
“Zamin”ni Telegramʻda oʻqing!
