2026-yildan “Biznesni 15 daqiqada boshlash” tamoyili joriy etiladi, deb Kursiv xabar berdi.
Prezident Shavkat Mirziyoyev tadbirkorlar bilan uchrashuvda bu yangilik haqida ma’lum qildi. Yangi tizimda tadbirkor ro‘yxatdan o‘tayotgan vaqtda elektron raqamli imzo, bank hisob raqami, ijara shartnomasi va soliq organida ro‘yxatdan o‘tgan kassa apparatini bir vaqtning o‘zida olish imkoniga ega bo‘ladi.
Shu tariqa, olti-yetti kunlik rasmiylashtirish jarayoni 15 daqiqagacha qisqaradi.
Qo‘shimcha ravishda, 2026-yildan 10 ta litsenziya va ruxsatnoma talablari bekor qilinadi. Ayrim sohalarda esa faqat xabardor qilish tartibi joriy etiladi. Endilikda qoidabuzarlik aniqlansa, faqat korxonaning o‘zi javobgar bo‘ladi.
32 turdagi mahsulot — ko‘chat, mineral o‘g‘it, chorva ozuqasi va boshqalar uchun majburiy sertifikatlash bekor qilinadi. Majburiy sertifikatlar soni 459 tadan 288 taga qisqartiriladi. O‘rniga “muvofiqlikni deklaratsiyalash” tizimi joriy etiladi.
Shuningdek, tadbirkorlar endi iqtisodiy va ma’muriy sudlarga eksteritorial tartibda murojaat qilishlari mumkin bo‘ladi. Sud qarorlarining ijrosi cho‘zilsa, “astrent” tizimi ishga tushiriladi va qarzdor har bir kechiktirilgan kun uchun penya to‘laydi.
“Zamin”ni Telegramʻda oʻqing!
