O‘zbekistonda yaylovlardan o‘t o‘rish pulli bo‘ladimi? Qonunchilik palatasi izoh berdi

12 noyabr kuni ijtimoiy tarmoqlarda O‘zbekistonda yaylovlardan o‘t o‘rish uchun ham maxsus chipta sotib olish va pul to‘lash talab etilishi haqida xabarlar tarqaldi. Mazkur xabarlarga Oliy Majlis Qonunchilik palatasi matbuot kotibi G‘ulomjon Samadov munosabat bildirdi.

Uning ta’kidlashicha, ijtimoiy tarmoqlarda tarqalayotgan «endi o‘t o‘rish uchun ham chipta sotib olish kerak» mazmunidagi xabarlar asossiz.

Qayd etilishicha, Qonunchilik palatasida muhokama qilinayotgan «Yaylovlar to‘g‘risida»gi qonun loyihasi aholi va tadbirkorlar uchun qo‘shimcha moliyaviy yuklama yaratishni emas, balki yaylovlardan foydalanish imkoniyatlarini kengaytirishni nazarda tutadi.

Rasmiy izohda jamoat yaylovlarini aholiga bepul berish va ulardan tekin foydalanish tartibi belgilanayotgani ta’kidlangan.

Shu bilan birga, masalaning ayrim jihatlariga aniqlik kiritish zarur. Qonunchilik palatasi 10 noyabr kuni qonun loyihasini birinchi o‘qishda qabul qilgan. Hujjatda yaylovlardan foydalanish uchun chipta mexanizmi ham nazarda tutilgan, biroq uning pulli yoki bepul bo‘lishi palataning rasmiy xabarida aniq ko‘rsatilmagan.

Xalq demokratik partiyasi fraksiyasi yig‘ilishida esa loyiha tashabbuskori chipta pulli bo‘lishini aytgan. Prezidentning 2026 yil 14 oktyabrdagi qarorida tashkil etiladigan jamoat yaylovlaridan mahalliy aholi bepul foydalanishi belgilangan, ammo ushbu qarorda chipta mexanizmi nazarda tutilmagan.

Demak, qonun loyihasi hali yakuniy qabul qilinmagan. Yaylovlardan foydalanish, jumladan, o‘t va pichan o‘rish uchun chipta talab qilinishi hamda uning narxi qanday belgilanishi bo‘yicha yakuniy tartib hujjatning keyingi muhokamalari va qabul qilinadigan normalarga bog‘liq.