Srechko Katanes: "Terma jamoada nimalar qilganimizni bilishingiz kerak"

Biroz avval Srechko Katanes Oʻzbekiston milliy terma jamoasi boshqaruvini tark etgani e'lon qilindi.

Oʻzbekiston milliy terma jamoasi bosh murabbiyi Srechko Katanes sogʻligʻi bilan bogʻliq muammolar sababli Oʻzbekiston futbol assotsiatsiyasi bilan tuzilgan shartnomani oʻzaro rozilik bilan bekor qilishga qaror qildi. Ushbu xabarlardan soʻng saytimiz jurnalisti Abdulvosit Bektemirov sloveniyalik mutaxassis bilan bogʻlandi.

- Salom, janob Srechko. Bezovta qilganim uchun uzr, lekin ushbu damlarda sizga kuch va matonat tilayman. Ishonamanki, siz bu qiyinchilikni muvaffaqiyatli engib oʻtasiz. Siz bilan ishlash ancha qiziqarli boʻldi. Terma jamoamiz oʻyinlari orqali oʻzbek xalqini xursand qilish uchun chin dildan mehnat qilganingizni qadrlayman.

Ishonchim komilki, biz mundialga yoʻl olamiz va siz Oʻzbekiston terma jamoasining Jahon chempionatidagi debyut uchrashuvini tribunadan kuzatasiz.

Oʻzbekiston terma jamoasidagi faoliyatingiz haqida bir nechta savollarim bor edi. Ushbu savollarga javob bera olasizmi?

- Salom. Barcha tilaklaringiz uchun rahmat. Savollarga kelsak, biz nimalarga erishganimiz va undagi mening tutgan oʻrnim haqida gapirishim shart emas. Siz terma jamoada nimalar qilganimizni va qanday yutuqlarga erishganimizni bilishingiz kerak. Men shunchaki Oʻzbekistondagi barcha insonlarga salom yoʻllayman, men uchun terma jamoa murabbiyi boʻlish katta sharaf va baxt edi. Barchaga omad va yaxshilik.

Muallif: Abdulvosit Bektemirov “Zamin” yangiliklarini “Telegram”da kuzatib boring