Yoshlar qudrati va futboldagi tarixiy muvaffaqiyat – yangi O‘zbekiston ruhi

Yangi O‘zbekistonda har bir yangi kun yosh avlod uchun yanada keng imkoniyatlar eshigini ochmoqda. Prezident Shavkat Mirziyoyevning yurtdoshlarimizni Yoshlar kuni bilan samimiy tabrigi esa bugungi mamlakat taraqqiyoti va kelajagi yo‘lidagi yoshlarimizning o‘rni, vazifasi va orzulari yana bir bor e’tirof etildi.

Davlat rahbari nutqida nafaqat yoshlarimizning ilm-fan, sport va boshqa sohalardagi ulkan yutuqlari, balki butun millatning iftixoriga aylangan futbol jamoamizning tarixiy muvaffaqiyati alohida urg‘u bilan qayd etildi. Yaqinda mamlakatimizdagi eng katta futbol bayrami — milliy terma jamoamiz ilk bor Jahon chempionati yo‘llanmasini qo‘lga kiritgani haqida gapirdi. Bu voqea nafaqat futbol, balki yoshlar uchun yangi zamonaviy orzu va kelajak yo‘lidagi katta qadam bo‘lib qoldi.

Prezident so‘zlarida shunday g‘oya yotadiki: uzoq yillar davomida oddiy oila farzandlari bo‘lgan yoshlar ilmda, sportda va turli sohalarda o‘z qobiliyati va mehnatsevarligi tufayli orzu qilgan cho‘qqilarga erisha boshladi. Ilgari do‘stlarimiz va yaqinlarimiz uchun orzu bo‘lib tuyulgan natijalar — bugun hayotga aylandi.

"Yaqinda butun yurtimizda barchamiz uzoq kutgan katta futbol bayrami bo‘lib o‘tdi. Xalqimizning 34 yillik orzusi ushaldi – milliy terma jamoamiz tarixda ilk bor Jahon chempionati yo‘llanmasini qo‘lga kiritdi.

Yaqin-aqingacha umrini paxta dalasida o‘tkazgan oddiy oila farzandlari ilmda, sportda, boshqa sohalarda bunday yuksak marralarni egallashini tasavvur qilish ham qiyin edi.

Biz yoshlarimiz uchun sharoit yaratdik, ular bundan unumli foydalanib, baland cho‘qqilarni zabt etmoqda", - dedi davlatimiz prezidenti Shavkat Mirziyoyev.

Mamlakatimizda yaratilgan yangi shart-sharoitlar, erkin fikrlash, ta’lim va sport sohasidagi keng imkoniyatlar tufayli yoshlarimiz o‘z iqtidorini erkin namoyon etishga, jahon maydonida O‘zbekiston bayrog‘ini baland ko‘tarishga erishmoqda. Prezident ta’kidlaganidek, bu — barcha yoshlarimiz va ularni qo‘llab-quvvatlayotgan ota-onalar, ustozlar va butun xalqimiz g‘alabasidir.

Bugungi kunda ilmiy izlanishlar, IT, fan, madaniyat, san’at, sport kabi ko‘plab sohalarda yoshlarimiz o‘z iqtidorini namoyon qilib, dunyo arenasida O‘zbekiston nomi bilan faxrlanmoqda. Milliy terma jamoamizning muvaffaqiyati esa minglab yoshlar uchun ilhom va yangi imkoniyatlar eshigini ochib berdi.

Bunday ulkan tarixiy o‘zgarishlar va yuksalishlar davrida, har bir yosh o‘zini yangi taraqqiyot va zamonaviy O‘zbekistonning eng muhim qahramoni sifatida his qilishi mumkin. Chunki bu yurt kelajagi — yoshlar qo‘lida, ularning aqli, g‘ayrati va orzu-umidlarida! “Zamin”ni Telegramʻda oʻqing!