Bugun poytaxtimizdagi Olimpiya va paralimpiya shon-shuhrati muzeyida karate WKF hamda taekvondo WT bo‘yicha jahon chempionatlarida yurtimiz sharafini munosib himoya qilgan sportchilarni taqdirlash marosimi bo‘lib o‘tdi. Tantanali tadbirda oliy marralarni zabt etgan chempionlar, sovrindorlar va ularning ustoz-murabbiylari e’tibor markazida bo‘ldi.
Marosim davomida sportchilarga davlatimiz rahbarining qimmatbaho sovg‘alari hamda munosib pul mukofotlari topshirildi. Bu esa mamlakatimizda sportga bo‘lgan yuksak e’tibor, mehnat va g‘alabaning qadri qanchalik baland ekanini yana bir bor namoyon etdi.
Ayniqsa, sport tariximizda ilk bor ayollar o‘rtasida karate WKF bo‘yicha jahon chempionligini qo‘lga kiritgan Gulshan Alimardonova hamda o‘n yillik tanaffusdan so‘ng taekvondo WT bo‘yicha O‘zbekistonga jahon chempionligi olib kelgan Najmiddin Qosimxojiyev alohida e’tirof etildi. Ushbu ikki chempionga “BYD Song Plus” avtomobili va 15 ming AQSH dollaridan pul mukofoti topshirildi.
Shuningdek, jahon chempionatlarida kumush va bronza medallariga sazovor bo‘lgan sportchilar hamda ularni katta g‘alabalarga tayyorlagan murabbiylar ham e’tibordan chetda qolmadi. Ularga ham bir martalik pul mukofotlari taqdim etildi.
Bu kabi e’tirof va rag‘bat sportchilar uchun yangi zafarlar sari kuchli motivatsiya bo‘lib xizmat qilishi, o‘zbek sportining xalqaro maydondagi nufuzini yanada oshirishi shubhasiz.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
