"Manchester Yunayted" akademiyasi tarbiyalanuvchisi Kay Runi og'ir jarohatdan so'ng tiklanish jarayonining yangi bosqichiga o'tdi. Klub afsonasi Ueyn Runining o'g'li mart oyidan buyon maydonga tushmayotgan edi, biroq endilikda Karrington bazasida mashg'ulotlarni davom ettirmoqda. Bu haqda Goal.com xabar beradi.
Yosh futbolchi ijtimoiy tarmoqlarda mashg'ulot maydonidan surat joylab, muxlislarga xushxabar ulashdi. 16 yoshli hujumchi o'zining Instagram sahifasida «Yana yugurishni boshladim» deya qisqa izoh qoldirib, optimistik kayfiyatda ekanini namoyish etdi.
Kay Runi joriy mavsumda Darren Fletcher qo'l ostida ajoyib o'yin ko'rsatayotgan edi, biroq son qismidagi jiddiy jarohat uning rivojlanishini to'xtatib qo'ydi. Futbolchi bir oy avval mavsum u uchun muddatidan oldin yakunlanganini ma'lum qilib, keyingi mavsumga kuchliroq bo'lib qaytishga va'da bergan edi.
Jarohatga qadar yosh iqtidor egasi "Old Trafford" stadionida debyut qilishga ulgurgan edi. U bor-yo'g'i 119 daqiqa ichida ikkita gol va bitta samarali uzatmani amalga oshirib, otasidan o'tgan to'purarlik qobiliyatini namoyish etdi.
Bu Kay uchun birinchi jiddiy sinov emas. U 2025 yilning sentyabr oyida 19 yoshgacha bo'lgan terma jamoaga chaqirilganidan so'ng oyog'idan jarohat olgan edi.
Shunga qaramay, klub murabbiylari va mutaxassislar Runining ruhiy bardoshliligi va goldan foydalanish mahoratini yuqori baholamoqda.
“Zamin”ni Telegramʻda oʻqing!
