O‘zbekiston shaxmat terma jamoasi yana bir nufuzli xalqaro musobaqada ishtirok etadi. UzChess Federation tarqatgan ma’lumotga ko‘ra, shu yilning 17–21 iyun kunlari Hongkong shahrida Xalqaro shaxmat federatsiyasi — FIDЕ tomonidan jamoaviy rapid va blis bo‘yicha jahon chempionati o‘tkaziladi.
Ushbu musobaqada dunyoning eng kuchli shaxmat jamoalari qatnashishi kutilmoqda. Turnir yuqori raqobat va keskin bahslarga boy o‘tishi taxmin qilinmoqda.
O‘zbekiston terma jamoasi ham chempionatda kuchli va muvozanatli tarkib bilan ishtirok etadi. Jamoa safidan Javohir Sindarov, Nodirbek Abdusattorov, Nodirbek Yakubboyev, Shamsiddin Vohidov, Muhiddin Madaminov, Rustam Qosimjonov, Afruza Hamdamova, Umida Omonova hamda Akjol Rahmatullayev o‘rin olgan.
Tajribali grossmeyster Rustam Qosimjonov jamoa sardori sifatida qatnashadi. Ayni paytda jamoaning asosiy yetakchilari sifatida Javohir Sindarov va Nodirbek Abdusattorovga katta umid bog‘lanmoqda.
So‘nggi yillarda o‘zbek shaxmatchilari xalqaro arenalarda yuqori natijalar qayd etib kelmoqda. Ayniqsa, yosh avlodning tez o‘sishi va dunyo reytingida yuqori pog‘onalarga ko‘tarilayotgani mutaxassislar tomonidan alohida e’tirof etilmoqda.
Javohir Sindarov yaqinda Nomzodlar turniridagi muvaffaqiyatli ishtiroki bilan butun shaxmat olamini hayratda qoldirgan edi. Nodirbek Abdusattorov esa allaqachon jahon shaxmatidagi eng yorqin yulduzlardan biri sifatida tan olingan.
Mutaxassislar fikricha, O‘zbekiston terma jamoasining hozirgi tarkibi rapid va blis bahslarida istalgan raqibga jiddiy qarshilik ko‘rsata oladi. Ayniqsa, tezkor shaxmatda o‘zbek grossmeysterlarining tajribasi va sovuqqonligi muhim omil bo‘lishi mumkin.
Muxlislar esa Hongkongda o‘tadigan musobaqadan katta natijalar kutmoqda. Chunki so‘nggi yillarda O‘zbekiston shaxmati dunyo sahnasida tobora kuchli brendga aylanib bormoqda.
“Zamin”ni Telegramʻda oʻqing!
