Vincent Kompany va Bavariya hakamlar qaroridan gʻazabda

Chempionlar ligasi doirasidagi Bavariya va PSJ oʻrtasidagi bahs hakamlarning bahsli qarorlari tufayli katta shov-shuvga sabab boʻldi. Uchrashuvning 23-daqiqasida bosh hakam Joao Pinheiro Garri Keynning darvozabon bilan yakkama-yakka chiqib ketishiga yoʻl qoʻymay, oʻyindan tashqari holatni notoʻgʻri qayd etdi. Ushbu vaziyatda qanot hakami bayroqchani koʻtarmagan boʻlsa-da, bosh hakamning hushtagi oʻyinni toʻxtatib qoʻydi. Bu haqda Goal.com xabar beradi.

Ekspert Maykl Ballak hakamning bu qarorini keskin tanqid qilib, uni qoʻpol xato deb atadi. Uning fikricha, hakam vaziyatni oxirigacha qoʻyib berishi va VAR tizimi aralashuviga imkon qoldirishi kerak edi. Shuningdek, 29-daqiqada Nuno Mendes toʻpni qoʻli bilan toʻxtatganiga qaramay, hakam unga ikkinchi sariq kartochkani koʻrsatishdan bosh tortdi va aksincha, Bavariya futbolchisi Konrad Laymerga nisbatan notoʻgʻri qaror chiqardi.

Uchrashuv davomida yuzaga kelgan bu noxolisliklar Bavariya bosh murabbiyi Vincent Kompanyning keskin eʼtirozlariga sabab boʻldi. Sami Xedira ham DAZN telekanaliga bergan intervyusida hakamlar oʻyin natijasiga taʼsir oʻtkazganini va Bavariya jamoasi aniq nohaqlikka uchraganini taʼkidladi. Oʻyin yakuniga yaqin Vitinyaning jarima maydonchasi ichidagi harakati ham bahsli vaziyatlarni yanada koʻpaytirdi.