Madridning "Real" klubi ketma-ket ikki yil davomida omadsizlikka uchraganidan so‘ng, yana "eski tanish" — Joze Mourino variantiga qaytmoqda. Xo‘sh, nima uchun "Qirollik klubi" rahbariyati aynan portugaliyalik "Maxsus" mutaxassis tanlovida to‘xtalmoqda? Keling, buning asosiy sabablarini tahlil qilamiz.
1. "Ego"larni jilovlash: Kiyinish xonasiga "Temir qo‘l" kerak
Bugungi kunda "Madrid" yechinish kiyinish xonasi dunyoning eng saviyali, ammo shu bilan birga eng "katta" egoga ega yulduzlari bilan to‘lib-toshgan.
Muammo: Na Karlo Anchelottining yumshoq tabiati, na Xabi Alonso yoki Arbeloaning yosh g‘ayrati bu muhitni tartibga sola bildi.
Yechim: Bunday vaziyatda jamoaga faqatgina futbolchilardan ham kuchliroq shaxsiyat kerak. Klub mutasaddilari hozirgi holatning jiddiyligini anglagan holda, Mourinoning qattiqqo‘lligiga qarshi chiqishmayapti.
2. Florentino Peresning "Sinalgan usuli"
Madrid klubi prezidenti uchun sobiq murabbiylarni qaytarish — odatiy va ko‘pincha muvaffaqiyatli kechadigan tajriba.
Zinedin Zidan: Ikkinchi marta qaytganida jamoaga La Liga chempionligini taqdim etdi.
Karlo Anchelotti: Ikkinchi kelishida ikki bora Chempionlar ligasi kubogini Madridga olib keldi. Endi navbat Jozega kelgan ko‘rinadi. Peres tarixdagi omadli "qaytuvlar" an’anasini Mourino bilan davom ettirishga umid qilmoqda.
3. Logotip himoyachisi va media "jangchisi"
"Real" rahbariyati hozirda klubga nisbatan barcha jabhalardan — ham maydonda, ham uning tashqarisida bosim bo‘layotganini his qilmoqda.
"Bunday paytda 'Real' logotipini tish-tirnog‘i bilan himoya qiladigan, raqiblar va tanqidchilarning hujumini o‘z zimmasiga ola biladigan 'qalqon' kerak."
Mourino esa matbuot anjumanlarida va tashkiliy ishlarda klub manfaatlari uchun har qanday janjalga kirishdan qaytmaydigan mutaxassis sifatida tanilgan.
4. Tarix takrorlanmoqda: 16 yillik interval
Bundan roppa-rosa 16 yil muqaddam ham "Madrid" xuddi hozirgidek ikki yillik sovrinsizlikdan so‘ng Jozega qo‘ng‘iroq qilgan edi. O‘shanda uning faoliyati zafarlar bilan birga ulkan shov-shuvlarga ham boy bo‘lgan:
Hakamlar va raqib murabbiylari bilan ziddiyatlar;
Jurnalistlar bilan doimiy "urushlar";
Hatto klub ichidagi ayrim rahbarlar bilan kelishmovchiliklar.
Ammo shu janjallar ortida "Real" yana kuchli va qo‘rqinchli jamoaga aylangan edi. Bugungi Madridga aynan mana shunday "shok terapiyasi" zarurdek tuyulmoqda.
Sizningcha, Mourinoning qaytishi "Real"ni yana Yevropa taxtiga qaytara oladimi yoki bu eski janjallarning yangi boshlanishi bo‘ladimi?
“Zamin”ni Telegramʻda oʻqing!
