FIFA 2026 yilgi Jahon chempionati oldidan klublar uchun muhim moliyaviy dasturni amalga oshirishni rejalashtirmoqda. Unga ko‘ra, mundialda ishtirok etadigan futbolchilar uchun ularning klublariga yirik miqdorda kompensatsiya mablag‘lari ajratiladi.
El Partidazo de COPE nashri jurnalisti Melxor Ruisning ma’lum qilishicha, FIFA har bir futbolchi uchun klublarga kuniga 9 ming yevrodan ortiq pul to‘lashni ko‘zda tutmoqda. Bu esa katta turnirlarda o‘z o‘yinchilarini milliy termalar ixtiyoriga yuboradigan klublar uchun jiddiy moliyaviy qo‘llab-quvvatlash hisoblanadi.
E’tiborli jihati shundaki, kompensatsiya faqat futbolchining shartnomasiga egalik qilayotgan klubga berilib qolmaydi. Agar o‘yinchi ayni paytda boshqa jamoada ijara asosida to‘p surayotgan bo‘lsa, ushbu klub ham belgilangan to‘lovdan foyda ko‘rishi mumkin. Bu qaror futbolchi xizmatidan amalda foydalanayotgan jamoalar manfaatini ham inobatga olishga qaratilgan.
Bunday tizim klublar va milliy termalar o‘rtasidagi muvozanatni saqlashda muhim ahamiyatga ega. Chunki Jahon chempionati kabi yirik musobaqalar vaqtida futbolchilar uzoq muddat o‘z klublaridan chetda bo‘ladi. Shu davrda klublar ularsiz tayyorgarlik ko‘rishi yoki yangi mavsum rejalarini tuzishiga to‘g‘ri keladi. FIFA kompensatsiyasi esa bu jarayonda klublar uchun ma’lum darajada moliyaviy kafolat vazifasini bajaradi.
Ma’lumot uchun, 2026 yilgi Jahon chempionati AQSH, Kanada va Meksikada o‘tkaziladi. Musobaqa 11 iyunda start olib, 19 iyulga qadar davom etadi. Turnir umumiy hisobda 38 kunga cho‘ziladi. Demak, mundialda uzoqroq ishtirok etadigan terma jamoalar futbolchilari uchun klublarga to‘lanadigan mablag‘ ham sezilarli darajada oshishi mumkin.
Bu xabar, ayniqsa, tarkibida ko‘plab milliy terma futbolchilari bor yirik klublar uchun qiziqarli. Chunki bir nechta o‘yinchi Jahon chempionatida ishtirok etsa, umumiy kompensatsiya ancha salmoqli summaga aylanadi.
Qisqasi, FIFA 2026 yilgi mundialni nafaqat sport nuqtayi nazaridan, balki klublar manfaatini hisobga olgan holda ham tashkil etishga intilmoqda. Katta futbol katta xarajat talab qiladi, bu yerda esa klublar ham o‘z ulushini quruq qo‘l bilan topshirmasligi aniq.
“Zamin”ni Telegramʻda oʻqing!
