Shotlandiya chempionatida mavsum taqdiri so‘nggi turgacha cho‘zildi va hal qiluvchi bahs haqiqiy dramatik ssenariy asosida kechdi. Uzoq vaqt davomida chempionlik poygasida peshqadam bo‘lib kelgan “Harts” oxirgi qadamda maqsadiga yeta olmadi.
38-tur doirasida “Seltik” o‘z maydonida “Harts”ni qabul qildi. Uchrashuv Glazgodagi mashhur “Seltik Park” stadionida bo‘lib o‘tdi va mezbonlar 3:1 hisobida g‘alaba qozondi. Bu natija “Seltik”ni yana Shotlandiya chempioniga aylantirdi.
O‘yindan oldin vaziyat “Harts” uchun ancha qulay ko‘rinardi. Jamoa 80 ochko bilan chempionlikka juda yaqin turgan, amaldagi chempion “Seltik” esa 82 ochko bilan kurashni davom ettirayotgan edi. Mehmonlar uchun hatto durang ham tarixiy natijaga yetarli bo‘lishi mumkin edi.
Ammo futbol yana bir bor o‘zining shafqatsiz va kutilmagan tomonini ko‘rsatdi. “Harts” 66 yildan beri kutilgan chempionlikka bir qadam qolganda og‘ir zarba qabul qildi.
Uchrashuvda hisobni 43-daqiqada Lourens Shenklend ochdi va “Harts” muxlislariga katta umid bag‘ishladi. Biroq birinchi bo‘limga qo‘shib berilgan daqiqalarda “Seltik” penalti ishlab oldi. Arne Engels 45+3-daqiqada imkoniyatdan unumli foydalanib, hisobni tenglashtirdi.
Ikkinchi bo‘limda intriga yanada kuchaydi. “Harts” durangni saqlab qolsa, tarixiy chempionlikka erishishi mumkin edi. Ammo o‘yinning so‘nggi daqiqalari mehmonlar uchun haqiqiy tushkunlikka aylandi.
88-daqiqada Dayzen Maeda “Seltik”ni oldinga olib chiqdi. Bu gol “Harts”ning yillar davomida kutilgan orzusiga jiddiy zarba bo‘ldi. 90+8-daqiqada esa Osmand yana bir to‘p kiritib, bahsga yakuniy nuqta qo‘ydi — 3:1.
Shu tariqa, “Harts” chempionlikni so‘nggi lahzalarda boy berdi. Jamoa butun mavsum davomida kurashdi, peshqadamlik qildi, muxlislariga katta umid berdi, ammo eng muhim pallada bardosh berolmadi.
“Seltik” esa yana o‘z kuchini ko‘rsatdi. Glazgo klubi ketma-ket 5-marta, umumiy hisobda esa 56-marta Shotlandiya chempioniga aylandi. Bu natija klubning mamlakat futbolidagi ulkan ustunligini yana bir bor tasdiqladi.
E’tiborlisi, “Seltik” so‘nggi 15 mavsumda 14 marta chempionlikni qo‘lga kiritgan. Bu raqamlar Glazgo jamoasining ichki chempionatda qanchalik barqaror va kuchli ekanini yaqqol ko‘rsatadi.
Shotlandiya chempionati. 38-tur
“Seltik” — “Harts” 3:1
16 may. Glazgo. “Seltik Park”
Gollar: Engels, 45+3 penalti; Maeda, 88; Osmand, 90+8 — Shenklend, 43.
Bu finalga teng o‘yin “Harts” uchun alamli xotira, “Seltik” uchun esa navbatdagi afsonaviy sahifa bo‘lib qoladi. Futbolda ba’zan butun mavsumlik mehnat bir necha daqiqada hal bo‘ladi. Bu gal ham shunday bo‘ldi: “Harts” orzuga juda yaqin keldi, ammo “Seltik” oxirgi so‘zni o‘zi aytdi.
“Zamin”ni Telegramʻda oʻqing!
