O‘zbekiston milliy terma jamoasi markaziy himoyachisi Abduqodir Husanov “Manchester Siti” safida navbatdagi muhim sovriniga ega chiqdi. Angliya kubogi finalida Xosep Gvardiola shogirdlari Londonning afsonaviy “Uembli” stadionida “Chelsi”ni 1:0 hisobida mag‘lub etib, mavsumni yana bir titul bilan bezadi.
83 mingdan ziyod muxlis kuzatgan final bahsi “Manchester Siti” uchun oson kechmadi. “Chelsi” ayniqsa qarshi hujumlarda xavf tug‘dirishga harakat qildi. Ammo “shaharliklar” himoya chizig‘i, xususan Abduqodir Husanovning ishonchli harakatlari raqibga jiddiy imkoniyat bermadi.
Nufuzli cityxtra.co.uk sayti ekspertlari finaldan keyin “Manchester Siti” futbolchilariga baho berdi. E’tiborlisi, Abduqodir Husanov 7 ball bilan jamoadagi eng yuqori baholangan himoyachilardan biri bo‘ldi. Manba uni maydondagi eng kuchli himoyachi sifatida e’tirof etdi.
Ekspertlar Husanovning o‘yinini alohida ta’kidlab, u har doimgidek o‘zining yuqori tezligi, vaziyatni oldindan o‘qiy olishi va hujumchilarni ta’qib qilishdagi aqlli harakatlari bilan ajralib turganini qayd etdi. Ayniqsa, Joao Pedroga qarshi epizodlarda o‘zbekistonlik himoyachi juda sovuqqon va ishonchli ko‘rindi.
Finaldagi eng yorqin vaziyatlardan biri “Chelsi” qarshi hujumi vaqtida yuz berdi. Joao Pedro golli vaziyatga chiqishi mumkin bo‘lgan pallada Husanov ortga katta tezlikda qaytib, xavfli hujumni bartaraf etdi. Aynan shu epizod uning nafaqat jismoniy tayyorgarligi, balki maydonni his qilish qobiliyati ham yuqori ekanini ko‘rsatdi.
“Manchester Siti” darvozasini qo‘riqlagan Jeyms Trafford 7 ball oldi. U o‘yin davomida katta bosimga duch kelmadi, chunki “Siti” so‘nggi yarim soatgacha o‘yinni nazorat qildi. Faqat burchak to‘pi vaqtida kichik xatoga yo‘l qo‘ydi, ammo bu holat jamoa uchun xavfli oqibat keltirmadi.
Mateus Nunes 6,5 ball bilan baholandi. U o‘ng qanotdan hujumlarga faol qo‘shildi, to‘pni jarima maydoniga yetkazishga urindi va dastlabki daqiqalarda Gustoning xavfli uzatmasini burchakka chiqarib, muhim himoyaviy ishni bajardi.
Mark Gexi 5,5 ball oldi. U jarima maydonida ancha ishonchli harakat qildi, burchak to‘plarida xavf tug‘dirdi va Pedroni to‘xtatishda Husanov bilan yaqin hamkorlik qildi. Ayrim vaziyatlarda qarorlari yanada aniqroq bo‘lishi mumkin edi, ammo umumiy manzarada yomon o‘yin o‘tkazmadi.
Niko O'Rayli 6,5 ballga loyiq ko‘rildi. U chap qanotda agressiv yugurishlar qildi, “Chelsi”ning past himoya chizig‘ini yorib o‘tishga intildi va bir necha bor jarima maydoniga xavfli to‘plar yetkazishga harakat qildi.
Rodri 6 ball oldi. Ispaniyalik yarim himoyachi maydon markazida aql, tajriba va kuch uyg‘unligini namoyish etdi. U 60 daqiqa davomida o‘yinni boshqardi, keyin esa kuch jihatdan biroz pasaydi. Bu uning uzoq muddat maydondan chetda qolganini hisobga olganda tabiiy holat edi.
Bernardu Silva ham 6 ball bilan baholandi. U markazda faol harakat qildi, bir necha bor xavfli uzatmalar amalga oshirdi. Ammo “Siti” yaratgan imkoniyatlardan to‘liq foydalana olmagani uning ham bahosiga ta’sir qildi.
Jeremi Doku 6,5 ball oldi. U doimiy ravishda raqib himoyasini bezovta qildi, yakkama-yakka kurashlarda faol bo‘ldi va birinchi bo‘limda Fofana uni to‘xtatishga majbur bo‘lgan vaziyatlar ham uchradi.
Omar Marmush 5,5 ball bilan baholandi. U hujumlarni yakunlashda yanada aniqroq harakat qilishi mumkin edi. Shunga qaramay, Marmush maydonda jamoa uchun foydali vazifalarni bajardi va bir nechta istiqbolli epizodlarda qatnashdi.
Finalning eng yaxshi futbolchisi sifatida Antuan Semeno tan olindi. U 7,5 ball oldi. Semeno jarima maydoni ichidagi aniq zarbasi bilan “Manchester Siti”ga g‘alaba keltirdi. Uning goli jamoa uchun murakkab kechayotgan finalda hal qiluvchi burilish bo‘ldi.
Erling Holand 6,5 ball bilan baholandi. Norvegiyalik hujumchi doimiy ravishda kerakli hududlarda paydo bo‘ldi, Sanches darvozasiga xavf soldi, ammo bu gal gol urishda unga omad yetishmadi.
Zaxiradan maydonga tushgan Rayan Sherki 7 ball oldi. U Marmush o‘rniga tushganidan keyin “Siti” hujumlariga yangi nafas berdi, bir necha xavfli vaziyatlar yaratdi va jamoa o‘yinini jonlantirdi. Ekspertlar aynan shu almashtirish g‘alabaga bilvosita ta’sir qilgan bo‘lishi mumkinligini ta’kidladi.
Mateo Kovachich esa 6 ball bilan baholandi. U charchagan Rodri o‘rniga maydonga tushib, markazda tartib va intizomni saqlashga yordam berdi. So‘nggi 30 daqiqada “Siti” o‘yin nazoratini qo‘ldan chiqarmasligida xorvatiyalik futbolchining hissasi bor.
Abduqodir Husanov uchun bu final alohida ahamiyatga ega bo‘ldi. U “Manchester Siti” bilan ikkinchi sovrinini qo‘lga kiritdi va yana bir bor katta o‘yinlarda bosimga tayyor ekanini isbotladi. Angliya kubogi finali kabi sahnada ishonchli harakat qilish har qanday himoyachi uchun katta sinov.
Eng muhimi, Husanov faqat sovrin yutgan futbolchi sifatida emas, balki g‘alabaga real hissa qo‘shgan himoyachi sifatida e’tirof etildi. Uning tezligi, jasorati va vaziyatni to‘g‘ri baholay olishi “Siti” himoyasi uchun juda muhim bo‘ldi.
O‘zbekistonlik muxlislar uchun bu kecha faxrli bo‘ldi. Chunki Husanov “Uembli”da final o‘ynadi, sovrin ko‘tardi va nufuzli manba tomonidan yuqori baholandi. Bu endi shunchaki yaxshi o‘yin emas, bu — katta futbolda o‘z o‘rnini mustahkamlash yo‘lidagi navbatdagi dadil qadam.
Qisqasi, “Siti” kubokni oldi, Husanov esa yana ishonchni oqladi. Himoyada shunday o‘yin ko‘rsatsa, raqib hujumchilari uchun tun uzoq, muxlislar uchun esa kayfiyat baland bo‘ladi.
“Zamin”ni Telegramʻda oʻqing!
