Украина Бош прокуратураси Харкив областининг Россия оккупациясидан озод қилинган ҳудудларида россиялик ўқитувчилар қўлга олингани ҳақидаги хабарларни рад этди.
«Бош прокуратура маълумотларига кўра, Украина ҳуқуқ-тартибот идоралари ходимлари Харкив областининг босиб олинган ҳудудларида россиялик ўқитувчиларни ушламаган», — деди қуролли тўқнашув шароитида содир этилган жиноятларга қарши кураш бошқармаси бошлиғи Игор Белоусов «Настоящее время» нашрига берган интервьюсида.
Харкив, Донецк ва Луганск областлари прокуратурасидаги «Настоящее время» манбалари ҳам рус ўқитувчиларини қўлга олмаганини даъво қилмоқда.
Россия армияси томонидан босиб олинган Харкив области ҳудудларидаги Украина мактабларига рус дастури бўйича дарс бериш учун келган россиялик ўқитувчиларнинг қўлга олингани ҳақидаги хабар 12 сентябр куни «Страна.ua» томонидан тарқатилди. Унда Украина бош вазири ўринбосари Ирина Верешчукнинг ҳибсга олингани айтилаётган ўқитувчилар ҳақидаги изоҳи чоп этилган.
Верешчукнинг сўзларига кўра, бу одамлар Украинага қарши жиноят содир этган, бунинг учун улар Жиноят кодексининг 438-моддаси – «уруш қонунлари ва одатларини бузиш» бўйича суд қилинади. Ушбу моддада кўрсатилган қилмишни содир этганлик 12 йилгача озодликдан маҳрум қилиш билан жазоланади.
Шундан сўнг Россия Таълим вазирлиги Харкив областида россиялик ўқитувчилар ишламаганини ва «1 сентябрдан буён у ерда маҳаллий ўқитувчилар ишлаб келаётганини» маълум қилди. Харкив областининг Россия томонидан тайинланган оккупацион маъмурияти ҳам минтақада рус ўқитувчилари йўқлигини таъкидлади. Унинг вакиллари бу икки фуқароликка эга ёки «ДХР» ва «ЛХР» паспортлари эгалари бўлган одамлар бўлиши мумкинлигига аниқлик киритмади.
Кейинчалик, Россия Таълим вазирлиги Украинадаги рус ўқитувчилари Россия ҳарбийлари ҳамда «ЛХР» ва «ДХР» ҳарбийлари томонидан назорат қилинадиган ҳудудларда «ҳимоя остида» эканлигини тасдиқлади. Шу билан бирга, Россия Тергов қўмитаси раҳбари Александр Бастрикин 13 сентябр куни эрталаб ўқитувчиларнинг қўлга олиниши бўйича жиноий иш қўзғатишни топширди. Тергов қўмитасининг Telegram-каналида бу ўқитувчилар «Россия дастурлари бўйича ўқитган» дейилган.
10 сентябр куни «24 канал» ўқитувчиларнинг қўлга олингани ҳақида манбаларга таянган ҳолда хабар берди. Таъкидланишича, рус ҳарбийлари «бир кун аввал Россиядан олиб келинган ўқитувчиларни шунчаки ташлаб кетишган». Олий рада депутати Олексий Гончаренконинг ёзишича, Купянскда рус ўқитувчилари ушланган. Аввалроқ Россия форумларида россиялик ўқитувчиларни Мариупол ва Россия томонидан оккупация қилинган Украинанинг бошқа шаҳарларида ишлашга таклиф қилувчи эълонлар бир неча бор жойлаштирилган эди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
