Вилнюсда НАТОнинг икки кунлик саммити давом этмоқда, унда альянс иттифоқчилари Украинага ҳар томонлама ёрдам беришга тайёр эканини билдирди. Қурол юборадиган давлатлар орасида Буюк Британия, Германия, Дания, Австралия, Франция бор.
Қуйида НАТОга аъзо мамлакатларнинг янги ёрдам пакетлари ҳақида муҳим маълумотлар тақдим этилади.
Германиядан “Вилнюс” тўплами
11 июль куни НАТО саммитининг биринчи кунида Германия канцлери Олаф Шольц мамлакат Украинага қарийб 700 миллион евролик янги ҳарбий ёрдам пакетини тайёрлаганини айтди. У “Вильнюс” номини олган.
Берлин Киевга Патриот ҳаво мудофаа тизимининг иккита учирувчи қурилмасини, 40 та Marder пиёда жанговар техникасини, 25 та Leopard 1А5 танкини топшириш ниятида.
Шунингдек, Украинага бешта таъмирлаш-тиклаш зирҳли техникаси, 20 минг дона артиллерия ўқ-дорилари ва 5000 дона 155 миллиметр калибрли тутун снарядлари, миналардан тозалаш ускуналари юборилади.
Бундан ташқари, Германия янги ёрдам пакетига немис LUNА қисқа масофали разведка ускуналари ва дронларга қарши ускуналар тўпламини киритган.
Буюк Британиядан Challenger 2
Британия бош вазири Риши Сунак 12 июль куни Украинага янги 65 миллион долларлик ҳарбий ёрдам пакетини эълон қилди. Ажратилган маблағ Британияда ускуналарни таъмирлаш ва ҳарбий реабилитация марказини яратишга йўналтирилади. Уни молиялаштириш НАТОнинг Украинага кенг қамровли ёрдам пакети ҳисобидан амалга оширилади.
Бундан ташқари, Британия Украинага 70 дан ортиқ жанговар ва логистика воситалари, шунингдек, Challenger 2 танклари учун минглаб снарядлар беришга тайёр.
Норвегия ва Даниядан NASAMS
Норвегия ҳукумати Украинага NASAMS ҳаво мудофаа тизимларини қўллаб-қувватлаш пакетини тақдим этади. Норвегия Мудофаа вазирлиги Киевга иккита қўшимча ёнғинни назорат қилиш маркази, иккита NASAMS ракетаси ва эҳтиёт қисмларни беришини маълум қилди.
Дания, шунингдек, Украинага иккита NASAMS ҳаво ҳужумидан мудофаа тизими ва 1000 та Black Hornet дрони юборади.
Австралиядан зирҳли машиналар
Австралия бош вазири Энтони Альбаниз мамлакат Украинага 20 та Бушмастер Protected Mobility Vehicles тақдим этишини тасдиқлади. Бу ҳақда ҳукумат раҳбари Twitter’да маълум қилди.
“Янги ҳарбий ёрдам пакети Бушмастерларнинг умумий сонини 120 тага етказади”, — дейди Бразилия бош вазири.
Зеленский бунга жавобан Украинага берилаётган янги мудофаа пакети учун миннатдорлик билдирди.
“Раҳмат! Кучли янги мудофаа пакети, жумладан, 30 таBushmaster. Ҳар доимгидек, бизда тўлиқ сиёсий тушуниш бор. Муваффақиятли учрашув”, — деб ёзди Украина президенти Twitter’даги саҳифасида.
Франциядан қанотли ракеталар
Франция Украинага SCALP қанотли ракеталарини топширади, ОАВнинг Париждаги дипломатик манбага таяниб хабар беришича, уларнинг бир қисми аллақачон Украинага етказилган.
Ўз навбатида, Киев “Россиянинг халқаро ҳамжамият томонидан тан олинган ҳудудига” ҳужум қилиш учун ракеталардан фойдаланмасликка ваъда бермоқда.
Эслатиб ўтамиз, 11 июль куни Вилнюсда бўлиб ўтаётган НАТО саммитининг биринчи кунида Франция президенти Эмануэл Макрон Украинага қурол-яроғ ва техника етказиб бериш ҳажмини ошириш ниятида эканини маълум қилди. У қандай турдаги ва қанча қуроллар ҳақида гап кетаётганига аниқлик киритмаган.
Япониядан дронлар аниқлаш тизими
Токио Украинага НАТО маблағлари ҳисобидан ажратилган 30 миллион доллар миқдорида дронларни аниқлаш тизимларини етказиб бермоқчи. Бу ҳақда Япония бош вазири Фумио Кисида НАТОнинг Вильнюсдаги саммитидаги чиқиши чоғида айтиб ўтди.
“Асосий қадриятлар ва стратегик манфаатларга эга бўлган ҳамкорлар ўзаро алоқаларини янада мустаҳкамлаши керак”, — деди у.
