Эрдўғон БМТни ислоҳ қилишга чақирди

^{Фото: Getty Images}
Туркия президенти Ражаб Тоййиб Эрдўғон дунёда юзага келаётган инқирозларни бартараф эта олмайдиган БМТни тезроқ ислоҳ қилиш зарурлигини таъкидлади.

Бу Украина можароси ва Ғазо секторидаги инқироз мисолларида яққол кўзга ташланади, деди у Истанбулда TRT-World медиа форумида.

"Россия-Украина уруши халқаро тизимнинг заифлигини кўрсатиб берди. Бу тизим Ғазодаги инқироз давридаги синовларга ҳам дош бера олмади. Буни имкон қадар тезроқ ислоҳ қилиш керак. Дунёнинг тақдири БМТнинг беш доимий аъзоси қўлида қолдирилиши мумкин эмас. Биз энди Иккинчи Жаҳон уруши шароитида эмасмиз. 194 давлатнинг тақдирини БМТ Хавфсизлик Кенгашининг беш аъзоси ҳал қила олмайди", деди Эрдўғон.

Туркия президенти аввалроқ БМТ Хавфсизлик кенгашини ислоҳ қилиш зарурлигини бир неча бор таъкидлаган. Унинг асосий тезислари 2021 йил сентябрь ойида чоп этилган “Адолатли дунёни қуриш мумкин” китобида баён этилган.

Мазкур китобда Эрдўғон глобал сиёсат муаммолари: миграция инқирози, халқаро терроризм, исломофобия, дискриминация, икки томонлама стандартларга эътибор қаратган.

Шунингдек, Туркия президенти Ражаб Тоййиб Эрдўғон 25 сентябрь куни БМТ Бош ассамблеясидаги чиқишида ташкилот ҳақида кескин гапирганди.

БМТнинг миллионлаб одамлар ҳалок бўлган Иккинчи жаҳон урушидан сўнг халқаро тинчлик ва хавфсизликни ҳимоя қилиш мақсадида ташкил этилганини эслатиб ўтди.

“Афсуски, сўнгги йилларда БМТнинг ўз асосий вазифасини бажаришда ожизлик кўрсатаётганини, тобора самара бермайдиган, қолоқ ва ҳаракатсиз тузилмага айланиб бораётганини кузатмоқдамиз”, деди у. “Замин” янгиликларини “Инстаграм”да кузатиб боринг