Россияда долларли миллиардерлар сони рекорд даражага етди

^{Владимир Потанин, Давид Якобашвили, Михаил Фридман и Петр Авен}
Америкадаги Forbes журнали 1 апрель куни эълон қилган янгиланган рўйхатга кўра, сўнгги бир йил ичида Россия фуқаролари орасида долларли миллиардерлар сони янги рекорд кўрсаткичга етди. Россия бу борада дунёда бешинчи ўринни эгаллаб турибди.

Forbes маълумотларига кўра, Россияда долларли миллиардерлар сони бир йил ичида 120 дан 140 кишига кўпайган, уларнинг умумий бойлиги эса 537 миллиард доллардан 580 миллиард долларга ошган. Forbes’нинг рус тилидаги версиясида эса 2025 йилда Россияда долларли миллиардерлар сони 146 кишига, уларнинг умумий бойлиги 625,5 миллиард долларни ташкил қилгани қайд этилган. Бу кўрсаткичлар 2021 йилдаги рекорд натижаларни ҳам ортда қолдирган.

Дунёдаги миллиардерлар рўйхатида Россиянинг ўрни

Forbes'нинг жорий рўйхатида жами 3028 киши бор. Миллиардерлар сони бўйича АҚШ (902), Хитой (516), Ҳиндистон (205) ва Германия (171) етакчилик қилмоқда. Россия эса бешинчи ўринни эгаллаб, ўз бойлар сонини кўпайтирган давлатлар қаторига кирди.

Энг бой россияликлар

Россиядаги энг бой шахслар орасида энг юқори ўринни «Лукойл» асосчиси Вагит Алекперов эгаллади. Унинг бойлиги 28,7 миллиард долларга етди. Ундан кейин «Северстал» ва «Новатэк» компаниялари раҳбарлари Алексей Мордашов (28,6 миллиард доллар) ва Леонид Михелсон (28,4 миллиард доллар) келмоқда.

Санкциялар ва россиялик миллиардерларнинг хориждаги ҳаёти

Forbes Russia маълумотларига кўра, 2022 йилда Украинадаги уруш сабабли Ғарб санкцияларининг кучайиши Россия миллиардерлари сони ва уларнинг умумий бойлиги кескин камайишига олиб келган эди. Бироқ сўнгги икки йил ичида бу кўрсаткичлар яна ўсиб, рекорд даражага етди.

Шу билан бирга, Россиянинг энг бой 20 фуқаросидан 14 нафари Ғарб санкцияларига дучор бўлган. Кўплаб миллиардерлар Россиядан ташқарида яшамоқда. Масалан, Андрей Мелниченко БААда, Михаил Прохоров Швейцарияда, Петр Авен Латвияда, Елена Батурина эса Буюк Британияда истиқомат қилмоқда.

Бу ҳолат Россия иқтисодиётидаги жараёнларнинг халқаро таъсирларга қарамасдан ривожланаётганини кўрсатади. Бироқ, санкциялар ва геосиёсий ноаниқликлар Россия бизнеси учун янги чақириқларни юзага келтирмоқда. “Замин” янгиликларини “Telegram”да кузатиб боринг