Украина президенти Владимир Зеленский Россия раҳбари Владимир Путинга музокараларни Киев пойтахтида ташкил этишни таклиф қилди. Бу ҳақда у ABC News телеканалидан берган интервьюсида маълум қилди. Унинг фикрича, Путиннинг Москвада учрашув ўтказиш ғояси аслида вақтни чўзишга қаратилган тактикадир.
“Ҳар куни мамлакатим ракета зарбалари ва ҳарбий ҳужумлар остида қолаётган бир пайтда мен Москвага бора олмайман. Мен террорчилар пойтахтига қадам қўймайман”, — деди Зеленский.
Президент таъкидладики, Украина Аляскада бўлиб ўтган илгари режалаштирилган учрашувда иштирок этмагани афсусли ҳол эди. Унинг фикрига кўра, Путин у ерда АҚШ президенти Доналд Трампдан ўз мақсадларига мос келадиган натижаларни олган. Зеленский Кремль раҳбари Украина билан тўғридан-тўғри мулоқот қилишда қизиқиш билдирмаётганини, аксинча Трамп билан учрашишни катта истак билан кутиб олаётганини қайд этди.
Шунингдек, Зеленский Россияга қарши қўшимча иқтисодий ва сиёсий босим зарурлигини таъкидлади. “Айрим ҳамкорларимиз ҳали ҳам Россия нефти ва газини сотиб олишда давом этмоқда. Бу — адолатсизлик. Россиянинг асосий қуроли — энергия ресурслари. Буни тўхтатишнинг энг таъсирли йўли — барча энергетик манбаларни харид қилишдан бутунлай воз кечиш”, — деди у.
Украина раҳбари хавфсизлик кафолатлари масаласига ҳам тўхталиб ўтди. Унинг фикрига кўра, мамлакатнинг ҳимоясини фақат миллий армияси таъминлай олади. Зеленский Донбассда Украина қўшинларининг мустаҳкам позициялари мавжудлигини таъкидлаб, Россия бу ҳудудни тўлиқ эгаллаб олиш учун катта қурбонлар беришга мажбур бўлишини қайд этди.
Шу билан бирга, у “буфер зона” яратиш ғояси катта хато эканини, чунки амалда 10–20 километрлик “ўлим зоналари” аллақачон мавжудлигини таъкидлади.
Зеленскийнинг сўзларига кўра, Путин Украина билан тўғридан-тўғри учрашишдан қочаётгани учун қабул қилиб бўлмайдиган таклифларни илгари сурмоқда ва бу сиёсий равишда яман қадам сифатида баҳоланиши лозим.
«Замин»ни Telegram’да ўқинг!
