Украина президенти Володимир Зеленский Россиянинг куз ва қиш мавсумида энергетика тизимини вайрон қилишга қаратилган эҳтимолий ҳаракатларига жавобан қатъий баёнот берди. Унинг сўзларига кўра, агар Москва Украина пойтахтида тўлиқ электр узилишини амалга оширишга уринса, Россиянинг ўз пойтахти ҳам худди шундай оқибатга дуч келиши мумкин.
«Агар, масалан, Киевда блэкаут билан таҳдид қилинса, Кремл яхши билиши керак – Москвада ҳам блэкаут юз бериши мумкин», – деди Зеленский журналистлар билан бўлиб ўтган брифингда.
Украина етакчисига кўра, Россия томонидан қўлланилаётган қўрқитишлар фонида дипломатик мулойимликка ўрин йўқ. – «Агар руслар таҳдид қилса, улар билан риторикада эҳтиёткор бўлиш зарур эмас. Маданиятсизлар билан маданиятли бўлиб муомала қилиш – менимча, на риторикада, на жанг майдонида, на Россияга нисбатан амалга ошириладиган жиддий қадамларда тўғри йўл эмас», – деди Зеленский.
Давлат раҳбари шунингдек таъкидлашича, Россия англаб етиши керак – цивилизацияли мамлакатлар ҳеч қачон тажовузни биринчи бўлиб бошламайди ва ҳеч қачон агрессор бўлмайди. Бироқ бу уларнинг заифлиги ёки кучсизлигини англатмайди.
Эслатиб ўтамиз, август ойида Россия Қуролли кучлари Украина энергетика инфратузилмасига ҳужумларни кучайтирди. Украина Энергетика вазирлиги маълумотларига кўра, Россия иситиш мавсуми яқинлашар экан, қасддан энергетик объектларни йўқ қилиш сиёсатини олиб бормоқда. Фақат август ойининг ўзида 10 кун ичида 20 та стратегик объект – электр нимстанциялари, иссиқлик электр станциялари ва нефтни қайта ишлаш заводлари зарбага учраган.
Шу билан бирга, Украина ҳарбийлари ҳам Россиянинг нефтни қайта ишлаш заводларига дронлар билан зарбалар бериб келмоқда. Бу зарбалар оқибатида айрим корхоналар қисман ёки бутунлай тўхтаган, бу эса ёқилғи танқислиги ва нархлар ошишига олиб келган.
Зеленскийнинг бу қатъий позицияси Украина Россиянинг кучайиб бораётган босим ва ҳужумларига қарши симметрик чоралар кўришга тайёр эканини яна бир бор кўрсатди.
«Замин»ни Telegram’да ўқинг!
