Украина президенти Володимир Зеленский АҚШдан эҳтимолий олинадиган Tomahawk («Томагавк») қанотли ракеталари ҳақида фикр билдириб, улар фақат ҳарбий объектларга қаратилган бўлишини таъкидлади. Унинг сўзларига кўра, Украина ҳеч қачон Россиянинг тинч аҳолисига қарши ҳужум қилмайди.
12 октябрь, якшанба куни Зеленский Fox News телеканалига берган интервьюсида бу масалага ойдинлик киритди. «Фақат ҳарбий нишонлар. Биз ҳеч қачон уларнинг тинч аҳолисига ҳужум қилмаймиз», — деди у The Sunday Briefing дастури эфирида.
Шу куни Зеленский икки кун ичида АҚШ президенти Доналд Трамп билан иккинчи суҳбатни ҳам амалга оширди. Украина раҳбари бу мулоқотни «жуда самарали» деб баҳолаб, икки томон долзарб масалалар бўйича келишувга эришганини маълум қилди. «Кечаги суҳбатда бугунги кун учун муҳим йўналишларни белгилаб олдик ва вазиятнинг барча жиҳатларини кўриб чиқдик», — деб ёзди у ижтимоий тармоқда.
Axios нашри маълум қилишича, 11 октябр куни бўлиб ўтган илк суҳбатда ҳам АҚШдан Украинага Tomahawk ракеталарини етказиб бериш масаласи муҳокама қилинган. Зеленскийнинг таъкидлашича, Россия бу эҳтимолдан хавотирга тушгани яққол кўзга ташланмоқда.
«Биз Россиянинг америкаликлар бизга “Томагавклар” бериши мумкинлигидан чинакам қўрқишини кўряпмиз. Бу ҳолат тинчлик йўлидаги босимнинг самарали эканидан далолат беради», — деб ёзди Зеленский ўз баёнотида.
Кузатувчилар фикрича, агар АҚШдан Украинага узоқ масофага учувчи ракеталар етказиб берилса, бу Россия устидан ҳарбий босимни кучайтириши мумкин. Бироқ Зеленскийнинг таъкидлашича, Украина бу қуролларни фақат мудофаа ва халқаро ҳуқуқ доирасида фойдаланиш ниятида.
Шундай қилиб, Киевнинг асосий позицияси аниқ: ҳеч қандай ҳужум тинч аҳолига қаратилмаслиги, барча ҳаракатлар фақат Россиянинг ҳарбий инфратузилмасига нисбатан амалга оширилиши лозим.
“Zamin”ни Telegram'да ўқинг!
