Украинадаги уруш оқибатлари Россия жамияти учун тобора оғирлашиб бормоқда. “The Moscow Times” нашри хабарига кўра, бу қуролли можаролар натижасида мамлакатда "янги ногиронлар армияси" пайдо бўлган. Статистик рақамларга кўра, бу сон Псков ёки Жанубий Сахалин аҳолиси билан тенглашиб қолган.
Россия Федерал статистика хизматининг Ягона идоралараро ахборот-статистика тизими эълон қилган маълумотларга кўра, 2023–2024 йиллар давомида Россияда ногиронлар сони 190 минг кишига кўпайган. 2024-йил охирига келиб, мамлакатдаги ногиронлар умумий сони 11 миллион 122 минг нафарга етган. Таққослаш учун: бу кўрсаткич 2023-йилда 11,04 миллион, 2022-йилда эса 10 миллион 932 минг бўлган.
Бу ўсиш суръати 2007-йилдан бери қайд этилган энг юқори кўрсаткич сифатида баҳоланмоқда.
Халқаро стратегик тадқиқотлар институти (IISS)нинг ҳисоб-китобларига кўра, 2024-йил охиригача Россияда 376 минг киши фронтда оғир жароҳат олиб, ногиронлик ҳолатига тушиб қолган. Уруш бошланган 2022-йилдан 2024-йилгача бўлган даврда Россия армиясининг умумий йўқотишлари тахминан 783 минг кишига етган. Улардан камида 172 минг нафари ҳалок бўлган, 611 минг киши эса жароҳатланган.
Шунингдек, ярадорларнинг 235 минг нафари соғайган бўлса, қолганлари бутун умр ногиронлик ҳолатида қолишган.
Меҳмон гуруҳидаги фойдаланувчилар ушбу мақолага изоҳ қолдира олмайди.
