Буюк Британия парламентининг Жамоалар палатаси ва Лордлар палатаси тамаки ҳамда вейп маҳсулотларини тартибга солишга оид янги қонун лойиҳасининг якуний вариантини келишиб олди. Ҳужжат энди қирол Чарлз III тасдиғини кутиб турибди. Шундан сўнг у тўлиқ кучга киради.
Янги қоидаларга мувофиқ, 2027 йил 1 январдан бошлаб 2009 йил 1 январдан кейин туғилган барча фуқароларга тамаки маҳсулотларини сотиш бутун умр давомида тақиқланади. Бу қарор келажак авлод учун тамакига қонуний йўлни аста-секин ёпиб боришни назарда тутади.
Яъни, қонун амал қила бошлаганида 17 ёш ва ундан кичик бўлганлар умри давомида сигарета, сигара, ўрама тамаки ва бошқа маҳсулотларни расман сотиб ололмайди. Ёш чегараси эса ҳар йили автоматик тарзда оширилиб, бутун жамият бўйича “тамакисиз авлод” шакллантирилиши режалаштирилган.
Шу билан бирга, электрон сигареталар ва вейпларга нисбатан ҳам назорат кескин кучайтирилади. Ҳукумат никотин маҳсулотларининг таъми, ташқи кўриниши ва реклама усулларини чеклаш бўйича кенг ваколатларга эга бўлади.
Қонунга кўра, кўплаб жамоат жойларида, жумладан мактаблар ва болалар майдончалари атрофида вейп чекиш ҳам тақиқланади. Шунингдек, вояга етмаганларга вейп маҳсулотларини сотиш ва тарғиб қилишга қарши қўшимча чекловлар жорий этилади.
Буюк Британия соғлиқни сақлаш вазири Уэс Стритинг бу қарорни “миллат саломатлиги учун тарихий бурилиш нуқтаси” деб баҳолади. Унинг таъкидлашича, чекиш ҳали ҳам мамлакатда олдини олиш мумкин бўлган ўлимларнинг асосий сабабларидан бири ҳисобланади.
Ҳар йили тахминан 80 минг нафар инсон айнан тамаки билан боғлиқ касалликлар туфайли ҳаётдан кўз юммоқда, бу эса Миллий соғлиқни сақлаш хизматига катта юклама юкламоқда.
Ҳукумат янги қонун ёшлар орасида чекиш даражасини кескин камайтиришга хизмат қилади ва узоқ муддатли истиқболда мамлакатни “тутунсиз жамият”га яқинлаштиради, деб ҳисобламоқда.
Қирол розилиги олингандан сўнг қонун босқичма-босқич жорий этилади. Биринчи қаттиқ чекловлар 2027 йилдан кучга киради. Бу ташаббус дунёдаги энг қаттиқ тамакига қарши қонунлардан бири сифатида баҳоланмоқда.
