Трамп Байденни сохта президент деб атаб, республикачиларни сайлов натижаларига қарши чиқишда давом этишга чақирди

^{Фото: AP Photo}
АҚШнинг амалдаги президенти Дональд Трамп мамлакатнинг сайланган президенти Жо Байденни сохта президент деб атади, деб ёзади «РБК». Бу ҳақда у ўз Twitter’ида пост қолдирди.

«Афғонистонда хизмат қилиб келган ёш ҳарбий менга Афғонистондаги сайловлар АҚШдаги 2020 йилги сайловлардан бир неча марта хавфсизроқ ва яхшироқ эканлигини айтди. Бизнинг почта орқали юборилган миллионлаб ва миллионлаб бюллетенлар билан ўтган сайловимиз учинчи дунё мамлакатларидаги сайловларга ўхшади. Сохта президент!», — деб ёзди Трамп.

Шунингдек, у матбуот эркинлиги йўқолганини ҳам таъкидлади. «Матбуот эркинлиги анчадан буён йўқолган, ОАВлар ёлғончи, энди бизда йирик технологик компаниялар бор, уларни тартибга келтириш керак», — деб ёзди президент. У судларни ёмон деб атади, шунингдек, ФҚБ ва Адлия вазирлиги ўз ишини бажармаганини қайд этди.

Трамп Республикачилар партиясидан сенаторлар президент лавозими учун курашни давом эттириши кераклигини таъкидлади. «Республикачи сенаторлар учун олдинга чиқиб, президенти лавозими учун курашадиган вақт келди, улар демократлар ҳақиқатан ҳам ғолиб чиққанида қандай курашса, шундай курашиши керак», — деб ёзди Трамп.

Унинг айтишича, 3 ноябрда бўлиб ўтган сайловлардаги қалбакилаштиришлар далилларини рад этиб бўлмайди. Мисол сифатида Трамп бюллетенлар киритилиши, қайта овозлар, вафот этган америкаликлар овозларининг ҳисобланиши, почта орқали юборилган бюллетенлардаги сохта имзоларни келтириб ўтди.

Twitter маъмурияти Трампнинг постига белги қўйиб, почта орқали овоз бериш жараёнининг хавфсизлиги ҳақида маълумот олиш учун ҳавола илова қилди.

Декабрь ўрталарида сайловчилар ҳайъати Трампнинг сайловдаги бош рақибини Американинг 46-президенти деб эълон қилди. Байден сайловчилар ҳайъати аъзоларининг 300 дан ортиқ овозини, амалдаги президент эса 230 дан зиёдроқ овозни қўлга киритди. Байденнинг инаугурацияси анъанага кўра Вашингтонда бўлиб ўтади.

Амалдаги Америка етакчиси ўз рақибининг ғалабасини тан олишдан бош тортиб, ҳамон сайлов натижалари юзасидан судларда даъволашишга уринмоқда. CNN ўз манбаларига таяниб хабар беришича, Трамп «чуқур эътироз» лаҳзаларида жазавага тушиб, Байденнинг инаугурацияси куни Оқ уйни тарк этмаслигини айтмоқда.

Байден эса ўз рақибини баъзи штатлардаги сайлов якунларини суд орқали бекор қилишга уриниб, бу билан халқ хоҳишига ҳурматсизлик кўрсатаётганликда айблади.

Axios маълумотларига кўра, Трамп 20 январь — Байден президент лавозимига киришадиган куни Оқ уйни вертолётда тарк этиб, сўнг Air Force One (АҚШда бортида давлат раҳбари бўлган ҳар қандай самолёт шундай аталади) самолётида Флоридага жўнаб кетишни ва у ерда Байденга қарши митингда нутқ сўзлашни мўлжалламоқда. “Замин” янгиликларини “Telegram”да кузатиб боринг