Дональд Трампга тегишли меҳмонхона 375 млн долларга сотилмоқда

^{Фото: Politico}
АҚШнинг собиқ президенти Дональд Трампга тегишли Trump Organization компанияси Вашингтондаги Trump International Hotel меҳмонхонасини CGI Merchant Group’га сотиш бўйича келишиб олди. Бу ҳақда The Wall Street Journal’га таяниб, «РБК» хабар берди.

Нашр манбаларининг маълумотларига кўра, битим қиймати 375 миллион долларни ташкил этади. CGI Merchant Group Трампнинг номини олиб ташлаш ниятида ва ҳозирда Hilton Worldwide Holdings билан брендинг ва мулкни бошқариш бўйича келишиб олган.

Меҳмонхона Оқ уй яқинидаги Пенсильвания-авенюда, собиқ почта бўлинмасида жойлашган. Меҳмонхонанинг ўзи Америка ҳукуматига тегишли, аммо у узайтириш имконияти билан 100 йил муддатга ижарага берилади.

Трампнинг компанияси эса уч йил ичида 150 миллион доллар фойда кўргани тўғрисида ҳисобот тақдим этганига қарамай, Вакиллар палатаси маълумотларига кўра, меҳмонхона 2016 йилдан буён зарарига ишламоқда. Бундан ташқари, меҳмонхонада Трампнинг президентлик даврида республикачилар партиясининг аъзолари тез-тез тўпланиб, лоббичилар ва қонун чиқарувчилар билан учрашиб турган.

WSJ маълумотларига кўра, битим 2022 йилнинг биринчи чорагида якунланади. Шу билан бирга, Вакиллар палатасининг Назорат қўмитаси Трампнинг 2016—2021 йиллардаги президентлик даврида манфаатлар тўқнашуви юз берган бўлиши мумкинлиги юзасидан тергов ўтказмоқда. Қўмита матбуот котибининг маълум қилишича, Вакиллар палатаси савдолар амалга оширилганига қарамай, терговни тўхтатмайди. «Манфаатлар тўқнашуви масаласи меҳмонхонанинг сотиб юборилиш йўли билан тўлиқ ҳал этилмайди», — дейди у.

Эслатиб ўтамиз, октябрь бошида Forbes АҚШнинг энг бадавлат инсонлари рўйхатини эълон қилган ва Трамп 25 йил ичида биринчи бор унга киритилмаган эди. Унинг рейтингга кириши учун 400 миллион доллар етмаган. Таҳлилчиларнинг баҳолашича, собиқ президентнинг бойлиги 2,5 миллиард долларни ташкил этади. “Замин” янгиликларини “Facebook”да кузатиб боринг