Инсон организмида муҳим рол ўйнайдиган пигментлардан бири — меланин ҳисобланади. Унинг асосий вазифаси тери, соч ва кўзларни ташқи таъсирлардан муҳофаза қилишдир. Айниқса, меланин қуёшдан келадиган ультрабинафша нурларни ютиб, уларнинг хавфли таъсирини камайтиради.
Теридаги меланиннинг асосий вазифаси — ультрабинафша нурларни ютиб, уларнинг ДНКга зарар етказишининг олдини олишдир. Чунки қуёш нурининг ортиқча таъсири терида куйиш жараёнини келтириб чиқаради, қариш жараёнини тезлаштиради ва ҳатто тери саратони хавфини кучайтиради.
Меланин бу хавфларни кескин камайтиради. Шунинг учун тери ранги тўқроқ бўлган одамлар қуёш таъсирига нисбатан яхшироқ ҳимояланган бўлади. Оқ танли инсонлар эса тезроқ куйиши ва уларда тери саратони хавфи юқори бўлиши мумкин.
Шу билан бирга, меланин инсоннинг ташқи кўринишига ҳам таъсир кўрсатади. У тери ранги ва умумий колоритни белгилаб, инсоннинг индивидуал қиёфасини шакллантиради.
