Япониянинг Fast Retailing Co. (Uniqlo бренди) ва Испаниянинг Inditex (ZARA бренди) компаниялари Россияда қайта фаолият бошлаши мумкинлиги ҳақида хабар тарқалди, деб ёзади TASS.
Fast Retailing Co. 2025 йил 31 август куни Роспатентга Uniqlo билан боғлиқ 10 та савдо белгисини рўйхатдан ўтказиш учун ариза топширди. Улар орасида GU, Fast Retailing, Uniqlo ва «Юникло» логотиплари ҳам бор. Компания ҳозирда Россияда 27 та савдо белгисига эга бўлиб, улардан иккитасининг амал қилиш муддати 2025 йил 14 октябрда тугайди.
Inditex ҳам ZARA учун савдо белгисини қайта рўйхатдан ўтказиш ишларини бошлаган ва янгиланган логотип тақдим этган.
Эслатиб ўтамиз, 2022 йил март ойида Uniqlo ва ZARA Россиядаги фаолиятини тўхтатган эди. Шу йилнинг октябрида эса Inditex ўз бизнесини арабнинг Daher Group ритейлерига сотганини маълум қилган.
Мутахассислар фикрича, ариза топширилиши бу брендларнинг Россия бозорига қайтишига ишора қилиши мумкин, аммо уларнинг ҳақиқий фаолият бошлаши ҳали расман тасдиқланмаган.
«Замин»ни Telegram’да ўқинг!
