Statista нашри 2024-йил учун дунёдаги энг йирик олтин конлар рўйхатини эълон қилди. Мазкур рейтингда Ўзбекистоннинг икки кони — Muruntau ва Олмалиқ мажмуаси — биринчи бешликка кирди, деб хабар берди Statista.
Рўйхатнинг етакчиси сифатида АҚШдаги Nevada Gold Mines кони қайд этилган. Иккинчи ўринда эса Ўзбекистоннинг Muruntau кони жой олди — у бутун Марказий Осиёдаги энг йирик олтин кони ҳисобланади. Учинчи ўринни Индонезиядаги Grasberg кони эгаллаган бўлса, тўртинчи ўринда Россиянинг Олимпиада кони қайд этилган. Бешинчи ўринда эса Ўзбекистоннинг яна бир лойиҳаси — Олмалиқ мажмуаси ўрин олди.
Бу натижа Ўзбекистоннинг сўнгги йилларда тоғ-кон саноатини модернизация қилиш ва экспорт салоҳиятини ошириш йўлидаги фаол ислоҳотлари натижаси сифатида баҳоланмоқда.
Мутахассисларнинг фикрича, Ўзбекистон олтин қазиб олиш ҳажми бўйича нафақат минтақада, балки бутун дунёда ҳам етакчи давлатлардан бири сифатида ўз мавқеини мустаҳкамламоқда.
Рейтингда, шунингдек, Қозоғистоннинг Kazzinc, Гананинг Ahafo, Малининг Loulo-Gounkoto ҳамда Конгодаги Kibali конлари ҳам ўрин олган.
Muruntau кони дунёдаги энг қадимий ва энг бой олтин захираларидан бири сифатида эътироф этилади, Олмалиқ эса замонавий технологиялар асосида қайта ишлов бериш имкониятлари билан ажралиб туради.
Меҳмон гуруҳидаги фойдаланувчилар ушбу мақолага изоҳ қолдира олмайди.
