Бразилиялик юлдуз Неймар 2026 йилги жаҳон чемпионати учун тайёрланган «Панини» стикерлар албомига киритилмади. 34 ёшли ҳужумчи сўнгги тўртта турнир давомида илк бор дунёнинг энг кучли футболчилари рўйхатидан жой олмади. Бу ҳақда Goal.com хабар беради.
«Панини» компаниясининг Бразилиядаги раҳбари Раул Валесилло ушбу қарорни махсус статистик ёндашув билан изоҳлади. Италиядаги мутахассислар футболчиларнинг сўнгги ўйинлардаги иштироки ва жароҳатларини ҳисобга олган ҳолда уларнинг якуний таркибга кириш эҳтимолини ҳисоблаб чиқишган.
Неймарнинг альбомдан тушиб қолишига унинг 2023 йил октябрь ойидан бери терма жамоада ўйнамаётгани сабаб бўлди. Уругвайга қарши баҳсда олган оғир жароҳатидан сўнг, футболчи ўзининг аввалги спорт формасини тиклай олмади.
Бразилия терма жамоаси бош мураббийи Карло Анчелотти якуний таркибни 18 май куни эълон қилади. Мураббий футболчиларнинг жисмоний ҳолатига жуда қаттиқ талаб қўйган бўлиб, бу Неймарнинг турнирга боришини сўроқ остида қолдирмоқда.
1994 йилги жаҳон чемпиони Рай ҳам Неймарнинг ҳозирги ҳолатидан хавотирда эканини билдирди. Унинг сўзларига кўра, ҳужумчи ўзининг тезлигини йўқотган ва халқаро даражадаги ўйинлар учун талаб қилинадиган жисмоний тайёргарликка эга эмас.
Албомнинг Бразилия бўлимида Алиссон, Маркинёс, Винисиус, Родриго ва ёш иқтидор Эстевао каби 18 нафар футболчига жой ажратилган. Тўплам 30 апрелдан сотувга чиқиши кутилмоқда.
“Zamin”ни Telegram'да ўқинг!
