Ливерпул ярим ҳимоячиси Флориан Виртс Муҳаммад Салахнинг ижтимоий тармоқдаги баҳсли пости остига нима учун «лайк» босганига изоҳ берди. Кўпчилик ушбу постни жамоа бош мураббийи Арне Слотга нисбатан танқид сифатида қабул қилган эди. Германиялик футболчи жамоа ичида ҳеч қандай исён йўқлигини таъкидлаб, мисрлик ҳужумчи шунчаки мавсум якунидаги ўз фикрларини очиқ баён қилганини айтди. Бу ҳақда Goal.com хабар беради.
Муҳаммад Салах ўзининг Instagram саҳифасида жамоанинг ҳозирги тактик йўналишини танқид остига олиб, собиқ мураббий Юрген Клопп давридаги жўшқин услубга қайтиш кераклигини шама қилган эди. Бу ҳолат Арне Слот ва Салах ўртасидаги муносабатлар ёмонлашгани, айниқса Интерга қарши ўйиндан сўнг вазият кескинлашгани ҳақидаги миш-мишларни болалатиб юборди. Флориан Виртс эса бу воқеани ОАВ бўрттириб юборганини таъкидламоқда.
«Мо клубни жуда яхши билади, у самимий инсон. У нима деб ўйласа, шуни айтади ва бу нормал ҳолат. Агар кимдир гапирмоқчи бўлса, бунга ҳақли бўлиши керак. Менимча, бу вазият аслида бўлганидан кўра каттароқ қилиб кўрсатилди. У ҳеч кимга ҳужум қилмаган», — дея тушунтирди Виртз The Athletic нашрига берган интервюсида.
Ярим ҳимоячининг сўзларига кўра, футболчиларнинг ушбу постни қўллаб-қувватлаши мураббийга қарши чиқиш эмас, балки жамоадошига бўлган ҳурмат белгисидир. Виртз Салахнинг менталитетини ва ишга бўлган муносабатини қадрлашини, у кўп нарсани кўрган тажрибали футболчи сифатида клубни ҳушёрликка чақирганини қўшимча қилди.
Ҳозирда Ливерпул бор эътиборини Чемпионлар лигаси йўлланмасини қўлга киритишга қаратган. Виртз жамоа таркиби кучли эканини ва ёзги танаффусдан сўнг янги мавсумда янада яхшироқ натижалар учун курашишларини маълум қилди.
“Zamin”ни Telegram'да ўқинг!
