Винисиус Жуниор Дани Карвахаль ва Давид Алаба билан ҳиссиётларга бой хайрлашув маросимида иштирок этмагани учун Испания матбуоти томонидан кескин танқидга учради. Испаниянинг нуфузли Marca нашри Реал Мадрид юлдузининг бу ҳаракатини "ҳурматсизлик" деб атади. Бу ҳақда Goal.com хабар беради.
Нашрнинг таъкидлашича, Винисиус Жуниорнинг бу тутуми "жамоа ичидаги ҳозирги тартибсизликнинг яна бир аломати"дир. Карвахаль "қироллик клуби" либосидаги узоқ йиллик фаолиятини майдонда муносиб якунлаётган бир пайтда, бразилиялик ҳужумчи аллақачон пляжларда дам олишни режалаштираётгани айтилмоқда.
Marca киноя билан ҳужумчининг аллақачон таътилга чиқиб кетганини қайд этди, чунки у учун ҳозирда асосий эътибор Жаҳон чемпионатига тайёргарлик кўришга қаратилган. Винисиус Жуниор Карло Анселотти бошчилигидаги Бразилия терма жамоаси таркибида турнирга йўл олади.
Дани Карвахаль Реал Мадрид сафидаги сўнгги ўйинини шанба куни Атлетик Билбао устидан қозонилган 4:2 ҳисобидаги ғалаба билан якунлади. Испаниялик ҳимоячи 13 йил давомида жамоа сафида 451 та ўйинда майдонга тушиб, жами 27 та совринни қўлга киритди. Давид Алаба ҳам жорий ёзда клубни тарк этмоқда; у 2021-йилда Бавария сафидан келиб қўшилган ва Мадридда икки бор Чемпионлар лигаси ғолибига айланган эди.
Реал Мадрид учун жорий мавсум омадсиз якунланди. Жамоа Ла Лига чемпионлигини Барселона клубига бой берди, Чемпионлар лигаси чорак финалида Бавария тўсиғидан ўта олмади ва Испания кубогида қуйи дивизион вакили Албасетега мағлуб бўлди. "Анъаналарга содиқ қолган эски Мадрид мухлислар олқиши остида кетмоқда, мавсумни бой берган янги Мадрид эса ўз муаммолари ичида қолмоқда", — дея хулоса қилди Marca.
“Zamin”ни Telegram'да ўқинг!
