Манчестер Юнайтед сардори Бруно Фернандес Англия Премер-лигаси тарихида бир мавсумда энг кўп голли узатмани амалга оширган футболчига айланди. Португалиялик ярим ҳимоячи якшанба куни Брайтон жамоасига қарши ўйинда ўзининг мавсумдаги 21-ассистини қайд этиб, афсонавий Тьерри Анри ва Кевин Де Бруйне натижаларини ортда қолдирди. Бу ҳақда Goal.com хабар беради.
Тарихий кўрсаткич чемпионатнинг сўнгги турида қайд этилди. 2020-йилда Sporting клубидан 65 миллион евро эвазига трансфер қилинган плеймейкер бурчакдан тўпни узатиб берди ва Патрикк Доргу уни боши билан дарвозага йўллади. Шу тариқа, Фернандес бир мавсумда 20 тадан ассист қайд этган Генри ва Де Бруйне рекордини янгилади. Шунингдек, у жорий мавсумда 8 та гол уриб, Англия Премер-лигасида мавсумнинг энг яхши футболчиси деб топилди.
Ушбу ютуқдан сўнг Фернандес ўз ҳис-туйғулари билан ўртоқлашди. "Бу ҳақда ўйлашнинг ўзи ҳаяжонли, чунки биз Кевин ва Тьерри ҳақида гапиряпмиз — улар лигамиз тарихидаги энг буюк ўйинчилардан. Уларнинг номлари билан бир қаторда туриш мен учун катта фахр", — деди Манчестер Юнайтед сардори Sky Sports нашрига берган интервюсида.
Шахсий муваффақиятларига қарамай, Фернандес жамоавий меҳнатни биринчи ўринга қўйди. У Манчестер Юнайтед сафида жами 327 ўйинда 106 та гол уришга муваффақ бўлган. "Агар жамоадошларим вазиятлардан фойдалана олмаса, менинг ассистларим ҳеч нарсани англатмайди. Шунинг учун бу рекордлар учун улардан миннатдорман", — дея қўшимча қилди у.
Эндиликда Фернандес бор эътиборини Португалия терма жамоаси сафидаги ўйинларга қаратади. Клуб билан амалдаги шартномаси 2027-йилгача мўлжалланган бўлса-да, Манчестер Юнайтед раҳбарияти сардорга янада яхшиланган янги битим таклиф қилишни режалаштирмоқда.
“Zamin”ни Telegram'да ўқинг!
