Лондоннинг “Арсенал” клубидаги фаолияти билан яхши танилган Россия миллий терма жамоаси собиқ футболчиси Андрей Аршавин 2026 йилги Жаҳон чемпионати олдидан Ўзбекистон миллий терма жамоаси ҳақида ўз фикрлари билан ўртоқлашди. Собиқ футболчи журналистлар билан суҳбатда вакилларимизнинг мундиалдаги имкониятлари, гуруҳдаги рақиблар ва айниқса Абдуқодир Ҳусановнинг ўсиши ҳақида қизиқ фикрлар билдирди.
Аршавинга Ўзбекистон терма жамоасидан ёздаги Жаҳон чемпионатида нималар кутиши ҳақида савол берилди. Ундан вакилларимиз учун мундиалга чиқишнинг ўзи катта ютуқми ёки гуруҳдан чиқиш имконияти ҳам борми, деб сўрашди.
Собиқ футболчи аввало Ўзбекистон учун Жаҳон чемпионатига чиқишнинг ўзи тарихий ва улкан натижа эканини таъкидлади. Ҳақиқатан ҳам, миллий жамоамиз илк бор мундиал йўлланмасини қўлга киритгани ўзбек футболи учун янги давр бошланганини англатади.
“Албатта, улар учун Жаҳон чемпионатига чиқишнинг ўзи катта ютуқ. Лекин ҳозир ҳатто гуруҳда учинчи ўринни олган жамоа ҳам кейинги босқичга чиқиши мумкин”, — деди Аршавин.
Бу фикр жуда муҳим. Чунки ЖЧ-2026 янги форматда ўтади ва айрим гуруҳларда учинчи ўринни эгаллаган жамоалар ҳам плей-оффга йўл олиш имкониятига эга бўлади. Демак, Ўзбекистон учун фақат иштирок этиш эмас, балки кейинги босқич учун курашиш имконияти ҳам мавжуд.
Аршавиннинг таъкидлашича, Ўзбекистон Португалия ва Колумбия каби кучли рақиблар билан бир гуруҳда бўлса ҳам, у учун “махфий имкониятларга эга” жамоа сифатида кўринади. Яъни рақиблар ва мутахассислар вакилларимизни ҳали тўлиқ ўрганмаган, аммо жамоада кутилмаган натижа қилиш учун салоҳият бор.
“Шунинг учун Ўзбекистон мен учун Португалия ва Колумбия билан бир гуруҳда бўлса ҳам, мусобақада имкониятлари махфий бўлиб турган жамоаси ҳисобланади”, — дея таъкидлади у.
Собиқ футболчи гуруҳдаги рақиблар ҳақида ҳам тўхталди. У Колумбия терма жамоасининг имкониятларини юқори баҳолашини айтди. Шу билан бирга, Конго Демократик Республикаси даражаси Ўзбекистондан катта фарқ қилади, деб ўйламаслигини билдирди. Бу эса вакилларимиз учун гуруҳда камида бир нечта ўйинда очко олиш имконияти борлигини англатади.
Аршавин яқинда Ўзбекистон терма жамоаси ўйинини стадионда кузатганини ҳам айтди. Унинг сўзларига кўра, жамоа футболчиларининг ҳаракати, ўйин услуби ва майдондаги иштиёқи унда яхши таассурот қолдирган. Айниқса, Элдор Шомуродовнинг ўйини унга маъқул келган.
“Яқинда Ўзбекистон терма жамоасининг ўйинига бордим. Йигитларнинг ўйини ва ҳаракати менга жуда ёқди. Элдор Шомуродов яхши ўйнади. Ўзбекистон ростмана ўйнайдиган, футбол кўрсатадиган жамоа”, — деди Аршавин.
Бу баҳо ўзбек футболчилари учун ёқимли эътироф. Чунки Аршавин каби катта футболни кўрган, Англия Премьер-лигасида ўйнаган ва халқаро майдонда тажриба тўплаган инсоннинг бундай фикри оддий мақтов эмас. У Ўзбекистон терма жамоасида ўйин ғояси, ҳаракат ва футбол кўрсатиш истаги борлигини алоҳида қайд этмоқда.
Суҳбат давомида Абдуқодир Ҳусанов ҳақида ҳам алоҳида савол берилди. Журналист Ҳусанов ушбу мавсум “Манчестер Сити”нинг энг яхши уч футболчиси қаторига кирганини фантастик ютуқ сифатида тилга олди. Аршавин эса ўз навбатида ўзбек ҳимоячисининг ўсиши уни ҳайратда қолдирганини яширмади.
“Мен учун бу ҳақиқий кашфиёт бўлди. Ростини айтсам, Абдуқодир Ҳусанов кимлигини у “Манчестер Сити”га ўтгунча билмасдим”, — деди собиқ футболчи.
Аршавин аввал Ҳусанов Англияда ўзини кўрсата олармикан, деган савол билан қараганини ҳам тан олди. Бу табиий ҳолат. Чунки АПЛ — дунёдаги энг тезкор, жисмонан кучли ва босими юқори чемпионатлардан бири. У ерда ҳимоячи сифатида ўз ўрнини топиш осон эмас. Аммо Ҳусанов бу шубҳаларга майдондаги ўйини билан жавоб берди.
“Мен ҳам аввал у Англияда ўйнаб кета олармикан, деб унга шубҳа билан қарагандим. Лекин у жуда яхши ўйнамоқда, бу ҳақда бошқа нима дейиш мумкин?” — дея қўшимча қилди Аршавин.
Абдуқодир Ҳусановнинг “Манчестер Сити”даги муваффақияти нафақат унинг шахсий карьераси, балки бутун ўзбек футболи учун катта воқеа бўлди. Дунё футболида энг юқори савиядаги клублардан бирида ўзини кўрсатиш ҳар қандай футболчи учун орзу. Ҳусанов эса бу имкониятдан самарали фойдаланмоқда.
Суҳбатда Ҳусановни катта футболчи қилиб шакллантирган асосий инсон Хосеп Гвардиолами, деган савол ҳам берилди. Аршавин бу борада мувозанатли жавоб қайтарди. Унинг фикрича, Абдуқодир аввало ўзини ўзи яратган футболчи. Яъни бу даражага етишида унинг шахсий меҳнати, интизоми ва характери асосий роль ўйнаган.
“Менимча, Абдуқодир ўзини ўзи шакллантирди”, — деди у.
Шу билан бирга, Аршавин Гвардиоланинг таъсирини ҳам инкор этмади. Унинг айтишича, Ҳусанов Пепнинг талабларига мос кела олгани ва испаниялик мураббий унга ишонч билдиргани ҳам муҳим омил ҳисобланади. “Манчестер Сити”да ишонч қозониш — бунинг ўзи катта даража.
“Аммо у Гвардиоланинг даражаси ва талабларига мос келиши, Пепнинг унга ишонч билдириши — бу ҳам Гвардиоланинг хизмати, деб ўйлайман. Шунга қарамай, менинг фикримча, Ҳусанов ўзини ўзи яратган футболчи”, — деди Аршавин.
Бу сўзлар Ҳусанов учун жуда салмоқли эътироф. Чунки футболда истеъдоднинг ўзи етарли эмас. Катта лигада ўзини кўрсатиш учун характер, меҳнат, тез ўрганиш қобилияти ва босимга бардош бериш керак. Ҳусанов айнан шу жиҳатлари билан эътибор қозонмоқда.
Эслатиб ўтамиз, Ўзбекистон миллий терма жамоаси 2026 йилги Жаҳон чемпионатида “К” гуруҳидан жой олган. Бу квартетда вакилларимиз Португалия, Колумбия ва Конго Демократик Республикаси терма жамоалари билан баҳс олиб боради.
Албатта, гуруҳ осон эмас. Португалия юлдузларга бой ва катта тажрибага эга жамоа. Колумбия техник, тезкор ва жисмонан кучли футболчиларга таянади. Конго Демократик Республикаси эса Африка футболига хос куч, тезлик ва курашувчанлик билан хавф туғдиради.
Аммо Аршавин айтганидек, Ўзбекистонни ҳозир “сирли имкониятларга эга” жамоа деб аташ мумкин. Терма жамоамизда Элдор Шомуродов каби тажрибали етакчилар, Абдуқодир Ҳусанов каби юқори даражада тобланаётган футболчилар ва янги авлод вакиллари бор. Энг муҳими, жамоа футбол ўйнашга, майдонда ўз ғоясини кўрсатишга интилаётгани сезилмоқда.
Жаҳон чемпионатида ҳар бир ўйин алоҳида тарих бўлади. Ўзбекистон учун бу биринчи мундиал, аммо бу фақат иштирок этиш учун сафар эмас. Миллий жамоамиз ўзини кўрсатиш, мухлисларни хурсанд қилиш ва дунёга ўзбек футболи қандай ўсганини намойиш этиш имкониятига эга.
Аршавиннинг сўзлари эса вакилларимизга нисбатан ташқи футбол муҳитида ҳам қизиқиш ортаётганини кўрсатади. Энди Ўзбекистонни камситиш қийин. Рақиблар ҳам, мутахассислар ҳам бу жамоа майдонда ҳақиқий футбол кўрсатиши мумкинлигини англаб бормоқда. Мундиалда эса барча гапларга якуний жавобни фақат майдон беради.
“Zamin”ни Telegram'да ўқинг!
