Бугун, 15-май куни NASAнинг Псйче космик аппарати Марс сайёраси ёнидан ўтиб, муҳим гравитацион манёврни амалга оширди. Зонд Марс сиртидан тахминан 4500 километр масофада учиб ўтди. Ушбу манёвр аппаратга ўз тезлигини ошириш ва асосий манзил — 16 Псйче металл астероидига йўналтирилган траекторияни тўғрилаш имконини беради. Бу ҳақда Ixbt.com хабар беради.
Ҳозирги вақтда соатига қарийб 20 минг километр тезликда ҳаракатланаётган аппарат Марс тортишиш кучидан фойдаланиб, қўшимча тезланиш олади. 2023-йил кузида старт олган ушбу миссия 2029-йилда Марс ва Юпитер ўртасидаги асосий астероидлар белбоғида жойлашган, диаметри 280 километрга тенг бўлган 16 Псйче объектига етиб бориши режалаштирилган.
NASA мутахассислари учун ушбу яқинлашув нафақат навигация, балки илмий жиҳатдан ҳам катта аҳамиятга эга. Аппаратдаги мультиспектрал камера Марснинг минглаб суратларини олади, бу эса қурилмани узоқ космик масофаларда эмас, балки йирик объектлар яқинида синаб кўриш учун илк имкониятдир.
Шунингдек, олимлар Марс атрофидаги заиф чанг ҳалқасини аниқлашга уриниб кўришади. Бу чанг зарралари Фобос ва Деймос йўлдошлари сиртидан микрометеоритлар таъсирида ажралиб чиққан бўлиши мумкин. Шунингдек, миссия жамоаси сайёра яқинидаги кичик табиий йўлдошлар ёки бўлакларни қидиради, бу тажриба келгусида астероидни ўрганишда қўл келади.
“Zamin”ни Telegram'да ўқинг!
