Moskva avtomobil zavodi 2026-yilda o‘z modellar qatorini yangilashga tayyorgarlik ko‘rmoqda. Kompaniya xabariga ko‘ra, o‘zgarishlar brendning eng arzon krossoveri bo‘lgan Moskvich 3 hamda flagman darajasidagi Moskvich 8 modellariga taalluqli bo‘ladi. Bu haqda Ixbt.com xabar beradi.
Hozircha Moskvich 3 modelidagi aniq texnik o‘zgarishlar sir tutilmoqda. 2022-yil oxiridan buyon sotuvda bo‘lgan va JAC JS4 negizida yaratilgan ushbu krossover avvalroq o‘rindiqlarni isitish tizimi, korroziyaga qarshi yaxshilangan himoya hamda telematik xizmatlar bilan boyitilgan edi. Hozirgi kunda model 150 ot kuchiga ega 1,5 litrli dvigatel va mexanik uzatmalar qutisi yoki variator bilan jihozlanadi.
Katta o‘lchamli Moskvich 8 modeli uchun ham 2026-yilda yangilanishlar rejalashtirilgan. Xususan, avtomobil zamonaviy telematik kompleks bilan jihozlanadi. Ayni paytda ushbu yetti o‘rinli krossover 174 ot kuchiga ega dvigatel va 7 pog‘onali robotlashtirilgan uzatmalar qutisi bilan sotilmoqda.
Mutaxassislarning fikricha, modellar qatorining yangilanishi savdo ko‘rsatkichlarini oshirishga xizmat qilishi mumkin. Statistik ma’lumotlarga ko‘ra, 2026-yilning birinchi choragida Rossiyada 2721 ta Moskvich avtomobili sotilgan, bu o‘tgan yilga nisbatan 25 foizga kamroqdir.
“Zamin”ni Telegramʻda oʻqing!
