Natalya Poklonskaya Rossiya bosh prokurorining maslahatchisi etib tayinlandi

^{Foto: «RIA Novosti»}
Natalya Poklonskaya Rossiya Federatsiyasi bosh prokurori Igor Krasnovning maslahatchisi lavozimiga tayinlanganini ma’lum qildi.

«Men ijtimoiy sahifalarimni yuritishni va har qanday ommaviy faoliyatni to‘xtataman. Endi ‘Rossiya Federatsiyasi prokuraturasi to‘g‘risida’gi Federal qonunga muvofiq Rossiya bosh prokurori tomonidan qo‘yilgan vazifalarni bajarish bilan shug‘ullanaman», — dedi Poklonskaya.

Qrimning sobiq prokurori va Davlat dumasi deputati, avval «Rossotrudnichestvo» rahbari o‘rinbosari lavozimida ishlagan Natalya Poklonskaya, Rossiyaning Ukrainaga qarshi urushini ochiqchasiga tanqid qilgan deyarli yagona rossiyalik amaldor bo‘ldi. 13 iyun kuni uning «Rossotrudnichestvo» rahbari o‘rinbosari lavozimidan bo‘shatilgani xabar qilindi.

Ukrainada urush boshlanganidan so‘ng, Poklonskaya Rossiya bosqinini «falokat» deb atagan, ruslar va ukrainaliklarni «bir-biriga nisbatan nafrat qo‘zg‘atadigan bu jinnilikni to‘xtatishga» chaqirgan hamda Z harfi Rossiya bosqinining asosiy belgisiga aylanganini — bu «Rossiya uchun ham, Ukraina uchun ham fojia va qayg‘u» ekanini aytgan.

Natalya Poklonskaya — asli Ukrainaning Voroshilovgrad (Lugansk) viloyatidan. Uning tug‘ilgan qishlog‘i 2014 yildan keyin LXR nazorati ostiga o‘tdi. Poklonskaya bolaligidanoq Qrimda yashagan. U prokuraturada ishlagan, Qrim Rossiyaga qo‘shilganidan keyin Qrim prokurori bo‘lgan. Ukrainada Poklonskaya davlatga xiyonatda ayblangan. “Zamin” yangiliklarini “Facebook”da kuzatib boring