Jennifer Lopes va Ben Afflek nikohining bekor qilinishi tarixdagi eng qimmat ajrim boʻlishi kutilmoqda

Ajrim jarayoni xonanda Jennifer Lopes va aktyor Ben Afflekka qimmatga tushmoqda. Gollivud yulduzlari hamkorlikdagi bir nechta reklama shartnomalarini qoʻldan boy berdi va birgalikda xarid qilingan hashamatli uyni sotishga majbur boʻldi.

^{Foto: USA Today}
Page Six ma'lumotlariga koʻra, Ben va Jenniferning rasman ajrashishi “tarixdagi eng qimmat ajrim” boʻlishi kutilmoqda. Ular allaqachon “yoshlikda iz qoldirgan munosabatlarini tugatishning million dollarlik yakuniy bosqichi”ga tayyorgarlik koʻrmoqda.

Umumiy mulkni boʻlishish ishlari hozirda davom etmoqda. Bir necha yil avval boʻlib oʻtgan hashamatli toʻy marosimi xarajatlari mazkur byudjetning deyarli yarmini tashkil qiladi.

^{Foto: People}
“Jennifer ushbu kunni — oq libosda doʻstlar davrasida boʻlish, goʻzal bezaklarga toʻla tabiat qoʻynidagi toʻyni oʻn yildan ortiq vaqt davomida orzu qilgan”, deya ta'kidladi manba. Ma'lum boʻlishicha, uch kunlik toʻy marosimi yulduzli juftlikka kamida sakkiz million dollarga tushgan.

Taxminlarga koʻra, 2003 yilda toʻyga bir kun qolganda barchasi bekor qilingan muvaffaqiyatsiz kundan keyin Ben va Jen qalbida armon qolgan, ammo yurakdagi tugallanmaganlik tuygʻusi ularni oxir-oqibat halokatga olib keldi.

^{Foto: TMZ}
“Ben va Jey Lo tugallanmagan muhabbat hikoyasining 20 yillik tarixini qaytadan varaqladi va oxir-oqibat barchasini yakuniga etkazdi. Endilikda ular uzoq yillik munosabatlar uchun yaratilmaganini aniq bilishadi. Ular koʻrishlari kerak boʻlgan barcha narsani koʻrdilar va hammasi tugadi”, deyiladi manbada. Er-xotin avgustning oxirigacha ajrim haqida rasman e'lon qilishlari kutilmoqda.

^{Foto: Getty Images}
Ben Afflek va Jennifer Lopes 2001 yilda tanishgan va uchrashuvdan koʻp oʻtmay aktyor Lopesga turmush qurishni taklif qilgan. Toʻy 2003 yilda boʻlib oʻtishi rejalashtirilgan edi, ammo marosimga bir necha kun qolganda toʻy bekor qilindi. Oradan roppa-rosa 20 yil oʻtgach, ular munosabatlarini tikladi va bir necha oydan soʻng yashirincha oila qurishdi.​ “Zamin” yangiliklarini “Telegram”da kuzatib boring