Putin tug‘ilgan kunini qanday nishonlaydi?

^{Foto: “TASS”}
Rossiya prezidenti Vladimir Putinning matbuot kotibi Dmitriy Peskov jurnalistlarga prezident 72 yoshini ish joyida nishonlashini ma’lum qildi. Ish jadvali yopiq ish uchrashuvlari va xalqaro telefon suhbatini o‘z ichiga oladi.

Kreml spikerining so‘zlariga ko‘ra, kechqurun Putin 8 oktyabr kuni bo‘lib o‘tadigan MDH sammitida ishtirok etish uchun Moskvaga yetib keladigan davlat rahbarlari bilan norasmiy muloqot qilishi kutilmoqda. Qayd etilishicha, Putin o‘z tug‘ilgan kunini bir necha yil ketma-ket ish muhitida nishonlab, shaxsiy sanalarni muhim biznes tadbirlari bilan uyg‘unlashtirib keladi.

2020 yilda Rossiya rahbari kunning birinchi yarmini ichki ishlar va xalqaro telefon suhbatlariga bag‘ishlagan. Kechqurun u do‘stlari va oila a’zolari bilan uchrashgan. 2021 yil 7 oktyabrda Putin Xavfsizlik kengashining doimiy a’zolari bilan operativ yig‘ilish o‘tkazgan, 2022 yilda esa o‘zining 70 yoshini nishonlagan Rossiya yetakchisi MDH davlatlari rahbarlarini Sankt-Peterburgdagi norasmiy sammitga yig‘gan.

2023 yilda ish dasturi yana bayramga to‘g‘ri kelgan. O‘shanda Putin Qozog‘iston orqali O‘zbekistonga Rossiya gazini yetkazib berishni yo‘lga qo‘ygan edi. O‘zbekiston va Qozog‘iston prezidentlari Shavkat Mirziyoyev hamda Qosim-Jo‘mart To‘qayev uning Moskva yaqinidagi qarorgohiga tashrif buyurib, Putin bilan birgalikda tushlik qilgan. “Zamin” yangiliklarini “Youtube”da kuzatib boring