Qodirov Putinning tugʻilgan kunida urushdagi harbiylarga “sovgʻa” yubordi (video)

^{Foto: Videodan kadr}
Checheniston rahbari Ramzan Qodirov urush zonasidagi harbiylar ehtiyoji uchun texnikalar partiyasini yubordi. U qoʻllab-quvvatlash aktsiyasini Rossiya prezidenti Vladimir Putinning tugʻilgan kuni bilan bogʻladi.

"Prezidentimiz Vladimir Putinning tugʻilgan kunida biz maxsus harbiy operatsiya ehtiyojlari uchun katta miqdordagi texnikani topshirdik. Tez orada jangchilarimizga 78 ta UAZ “Patriot”, UAZ-452 va “Niva” avtomobillari etkazib beriladi", dedi u.

Qodirov ushbu modellar turli iqlim sharoitlarida ishlay oladigan ishonchli va universal transport vositasi ekanini aytdi. U sotib olingan dronlar ham frontga yuborilishini ta'kidladi.

"Ular boʻlinmalarimizning jangovar qobiliyati va samaradorligini sezilarli darajada oshiradi. Zamonaviy texnika va uskunalar, shu jumladan, radioelektron kurash tizimlari (REB) nafaqat jangchilarimizning vazifasini engillashtiradi, balki ularning harakatchanligini sezilarli darajada oshiradi", deya xulosa qildi Checheniston rahbari.

Avvalroq Ramzan Qodirov urush ehtiyojlari uchun Rossiyaga 100 ta “Jihod mashinasi”ni bergandi. Checheniston rahbariga koʻra, mintaqada 2024 yilda “Chechenavto” bazasida “GAZ Sobol” va “GAZ Sadko” shassilari asosida jangovar mashinalarni seriyali ishlab chiqarish yoʻlga qoʻyilgan.

“Jihod mashinalari” esa Gudermesdagi Rossiya maxsus kuchlari universitetida sinovdan oʻtkazilgan. Chechnya Today nashrining ma'lum qilishicha, jami 400 ga yaqin jangovar avtomobil etkazib berish rejalashtirilgan. “Zamin” yangiliklarini “Telegram”da kuzatib boring