Andrey Sibiga AQSh va Evropa mamlakatlarini nimadan ogohlantirdi?

^{Foto: TASS}
Ukraina tashqi ishlar vaziri Andrey Sibiga Evropa davlatlari va AQShni mamlakatni faolroq qoʻllab-quvvatlashga chaqirdi. Hozirda bu boradagi sustkashlik yomon oqibatlarga olib kelishi mumkinligidan ogohlantirdi. Bu haqda Sibiga X ijtimoiy tarmogʻida yozdi.

“Hozir Ukrainaning sheriklari uchun charchoq yoki dam olish vaqti emas”, dedi vazir.

Sibiga tinchlikka erishish uchun Ukrainani koʻproq qoʻllab-quvvatlash zarurligini ta'kidladi.

Ukraina Moliya vazirligi 2024 yilda Kiyev Gʻarb davlatlaridan 41,7 milliard dollar miqdorida yordam olganini ma'lum qilgandi.

Ukraina moliya vaziri Sergey Marchenko ushbu mablagʻlar asosiy ijtimoiy xarajatlarni qoplash, jumladan, pensiyalar, ta'lim va tibbiyot xodimlarining maoshlarini toʻlash, shuningdek, aholini ijtimoiy himoya qilish dasturini ta'minlashga yordam berganini ta'kidladi.

Avvalroq Ukraina prezidenti Vladimir Zelenskiy Rossiyaga hududiy yon bosish shartini aytgandi. Unga koʻra, Ukraina Rossiya tomonidan bosib olingan hududlardan voz kechish evaziga NATOga qoʻshilish stsenariysini koʻrib chiqishi mumkin.

“NATO Ukrainaga qonuniy ravishda taklif qilinmoqda va biz Ukrainaning boshqa hududlarini tan olmasak-da, NATO Ukraina nazoratidagi qismda faoliyat yuritishi mumkin. Bu haqda kelishib olsa boʻladi. Bunga ishonchim komil”, dedi Zelenskiy amerikalik podkaster Leks Fridmanga bergan intervyusida. “Zamin” yangiliklarini “Youtube”da kuzatib boring