Suriyaning yangi hukumati Rossiyadan Asadni ekstraditsiya qilishni soʻradi

Rossiya chorshanba kuni Suriyaning yangi de-fakto rahbari bilan mamlakatdagi ikki harbiy bazasini saqlab qolish boʻyicha “ochiq” muzokaralar oʻtkazganini ma'lum qildi. Biroq, buning evaziga Moskva qanday talablar qoʻyayotgani haqida izoh berishdan bosh tortdi.

Muzokaralardan xabardor suriyalik manbaning Reuters agentligiga xabar berishicha, yangi rahbar Ahmad al-Shar'a Rossiyadan Suriyaning sobiq prezidenti Bashar al-Assadni topshirishni soʻragan. Uning aytishicha, Asad dekabr oyida Shar'a isyonchilari tomonidan agʻdarilgandan soʻng Rossiyaga qochib ketgan.

Suriyaning rasmiy SANA axborot agentligiga koʻra, Damashq shuningdek, Rossiyadan Suriyadagi fuqarolik urushi davomida Asad hukumatini qoʻllab-quvvatlagani uchun tovon toʻlash, mamlakatni qayta tiklash va qayta qurish boʻyicha aniq choralar koʻrishni talab qilmoqda.

Kreml matbuot kotibi Dmitriy Peskov Rossiyadan Asadni qaytarish va tovon toʻlash boʻyicha talab tushgan-tushmagani haqida savolga izoh berishdan bosh tortdi.

Rossiya yillar davomida Asad hukumatini qoʻllab-quvvatlab kelgan va hozirda Latakiya yaqinidagi Tartus dengiz bazasi hamda Xmeymim havo bazasini saqlab qolishni maqsad qilgan. Agar Moskva bu harbiy ob'ektlardan voz kechsa, bu uning mintaqadagi harbiy qudratiga jiddiy zarba berishi mumkin.

Suriyaning yangi ma'muriyati Rossiya tashqi ishlar vaziri oʻrinbosari Mixail Bogdanov boshchiligidagi delegatsiya bilan oʻtkazilgan muzokaralardan soʻng rasmiy bayonot berib, “munosabatlarni tiklash oʻtmishdagi xatolarni bartaraf etishi, Suriya xalqining irodasiga hurmat bilan yondashishi va ularning manfaatlariga xizmat qilishi lozimligini” ta'kidladi.

Biroq, suriyalik manbaning ma'lum qilishicha, Moskva oʻz xatolarini tan olishga tayyor emas. Hozircha erishilgan yagona kelishuv — muzokaralarni davom ettirish haqidagi qaror boʻldi.

Rossiya tashqi ishlar vazirligi esa “barcha masalalar boʻyicha ochiq muhokama boʻlganini” bildirib, ikki davlat oʻrtasidagi muloqot kelajakda ham davom etishini ta'kidladi. Shu bilan birga, harbiy bazalarga oid aniq kelishuvlar haqida hech qanday ma'lumot berilmadi.

Suriya sobiq prezidenti Bashar Asad va uning oilasi 2024 yil 8 dekabr kuni mamlakatni tashlab, Rossiyaga qochgan edi. Dmitriy Peskov unga boshpana berish haqidagi qaror shaxsan prezident Vladimir Putin tomonidan qabul qilinganini aytdi. Rossiya 2011 yilda Suriyada boshlangan fuqarolar urushida Bashar Asadni qoʻllab kelgan. “Zamin” yangiliklarini “Telegram”da kuzatib boring